Leloko la komiti ya profense ya Limpopo, Nkateko Mbhoma o bolailwe ka go thuntšwa

Liki ya Baswa ya African National Cogress (ANCYL) e netefaditše ka manyami a magolo lehu la leloko la komiti ya profense (PEC) ya Limpopo, Nkateko Mbhoma yo a bolailwego ka go thuntšwa mesong ya Labobedi, 9 Lewedi.

Go begwa gore Mbhoma o be a le leetong a feta Leeudoringstad ka ntle ga Klerksdorp a eya Kimberley go tsenela kopano ya kakaretšo ya bosetšhaba nakong ya ge a tla thuntšhwa. Kopano yeo e tla thoma ka Laboraro, 10 go fihla ka Labohlano, 12 Lewedi.

Ka pego ya yona, ANCYL e hlalošitše polao ye e le “tiragalo ya pefelo ye e se nago mogopolo” yeo e amogilego mokgatlo moetapele o moswa yo a ineetšego ka botlalo go lwantšheng tokologo ya baswa le go šoma kudu go matlafatša maphelo a batho.

Mokgatlo o rometše mantšhu a thobamatswalo go ba lapa la Mbhoma, bagwera, le makala a baswa a Limpopo, ebile o ba lakaletša maatla le kgothatso nakong ye e bohloko.

Liki e kgadile ka bogale ditiragalo tša bosenyi tšeo di tšwelago pele Afrika Borwa mme ya kgopela maphodisa gore a šome ka thata go golega bao ba amegago.

“Bosenyi ga bo na lefelo setšhabeng sa rena, gomme re kgopela mekgatlo ya tšhireletšo ya molao go šoma ka mafolofolo go netefatša gore bao ba amegago ba a swarwa, mme ba lebagane le maatla ka moka a molao. Toka e swanetše go phethagatšwa,” ya realo pego.

Liki e boetše ya tiišetša boitlamo bja yona go mafelo a bodulo ao a bolokegilego le tšhireletšo ya baetapele ba baswa bao ba šomelago setšhaba.