MMSEZ e ganetša ditatofatšo tša go tloša maswika ka sephiring lefelong la praefete
Musina-Makhado Special Economic Zone (MMSEZ) e gana ditatofatšo tša gore e tlošitše maswika a mašweu lefelong la motho ka sephiring ntle le tumelelo.
Se se latela pego yeo e bolelago gore MMSEZ e lebagane le tshepetšo ya molao ya R12 millione, ka morago ga gore mokontraka yo a beilwego go aga ditsela kua Musina a tloše maswika a mašweu a 35 000 cubic metres mo polaseng ya praefete.
Pego ye e oketša ka gore MMSEZ e tšwela pele le merero ya tlhabollo ntle le go latela mekgwa ya semolao, le gore ga e na peakanyo ya maleba ya go netefatša meetse bakeng sa projeke yeo.
CEO ya MMSEZ wa nakwana Irish Bologo o latola ditatofatšo tše ka gore ga di na nnete ebile di a timetša.
Bologo o re taba ya go tlošwa ga maswika a mašweu e be e šetše e tlile pele ga MMSEZ gomme e boletšwe le mong wa polase, Boetie Visser.
“Re nyamišitšwe ke go kwa gore Visser o išitše MMSEZ kgorongtsheko a nyaka R12 millione ka lebaka la go tlošwa ga maswika a go thwego ke a gagwe ka tsela ya go se dumelelane,” a realo.
O re go ya ka tsebo ya MMSEZ, ga go na kgopelo ya molao yeo e ngwadišitšwego kgahlanong le bona. “Ga re kgorongtsheko le motho, ntle le molato o mongwe wo o ilego wa lahlwa ke kgorotsheko ka di 5 Mopitlo ka ge o se wa tšhoganetšo,” a realo.
Bologo o re MMSEZ ga se e tloše maswika a mašweu mo lefelong leo. “Re kopane le Visser kantorong ya rena gomme ra mo hlalosetša gore MMSEZ e ka se tšeye maikarabelo ka dilo tšeo e sa di dirago. Ga se gwa loka gore re tsenywe ditatofatšong tše bjalo,” a hlalosa.
O re ba šetše ba boledišane le setšhaba go rarolla ditaba tša semolao tšeo di ka amago tlhabollo ya MMSEZ. “Re šoma ka molao ebile re hlompha dingongorego tšeo di ka tsogago ka lebaka la mošomo wo o tšwelago pele,” a realo.
