HLATSE YA MMUŠO POLAONG YA POLASE YA DIKOLOBE O NGONGOREGA KA GO BA KGOLEGONG LE BATHO BA BATSHO

Yo mongwe wa bagononelwa dipolaong tša Maria Makgato (45) le Lucia Ndlovu (34) bao ba bolailwego ka go thuntšhwa gomme ba fepša dikolobe o ile a ngongorega ka go ba le bathobaso kgolegong.

Se se utolotšwe ka mangwalong ao a tšweleditšwego kgorongkgolo ya tsheko ya Polokwane ka Laboraro, 22 Diphalane 2025 ka mangwalo ao a ngwadilwego ke mošomi wa polaseng Adrian Rudolph De Wet go ba lapa le bagwera ba gagwe. 

De Wet yo a fetogilego hlatse ya mmušo, mongmošomo wa gagwe wa molemirui wa dikolobe Zacharia Olivier (60) le mošomi wa polaseng, moagi wa Zimbabwe William Musora (50) ba eme tshekong ya dipolao tša Phato 2024 tša Makgato le Ndlovu. Mangwalo a ile a tšweletšwa ke ramolao wa Olivier’s Jacobus Venter go botšiša dipotšišo tše dingwe go De Wet.

“Bophelo bja ka kgolegong ga bo bonolo ka gobane kudu ke nna motho yo mošweu a nnoši kgolegong, ke na le bagolegwa ba bangwe ba bathobaso ba dikete. Go na le batho bao ba nyakago go mpona ke hwile kgolegong ye. Ke duma ge nkabe re theeleditše keletšo ya gago. O re lemošitše gore re tlogele go thuntšha batho bao ba tlago go utswa polaseng, eupša ga se ra ke ra theeletša,”go boletše le lengwe la mangwalo.

Boraro bjo bo lebane le ditatofatšo tša polao le maitekelo a polao morago ga gore Makgato le Ndlovu ba thuntšhwe ge ba be ba phuruphutša dijo tšeo di fetilwego ke nako tšeo di bego di reretšwe dikolobe tša Oliver’s gomme ka morago ba lahlelwe ka lefelong la dikolobe. Mabutho Ncube o phologile go thuntšhwa ka dikgobalo