Mogononelwa o swerwe morago ga go šomiša mangwalo a bofora dikgopelong tša mošomo

Monna wa mengwaga ye 41 o ile go tšwelela pele ga kgorotsheko ya Northam ka Labone, 14 Phato molatong wa bomenetša ka morago ga go dira kgopelo ya mošomo a šomiša mangwalo a bofora.

Se se latela morago ga gore a swarwe go la Brits ka Laboraro, 13 Phato ka morago ga gore a romele kgopelo ya mošomo wa maemo a godimo lefelong la moepo go la Northan a šomiša setifikheiti sa bofora.

Go ya ka maphodisa, monna yo go bolelwa gore o dirile kgopelo ya mošomo wa maemo a godimo mo lefapheng la moepo ka Phato 2023 ka go diriša setifikheiti sa go phatša sa maaka.

Mmoleledi wa maphodisa a Limpopo, Colonel Malesela Ledwaba o re taba ye e begilwe maphodiseng a Northam gomme ya fetišetšwa go lefapha la diphuputšo tša bomenetša la boditšhabatšhaba la profense ya Limpopo go dira dinyakišišo tšeo di tseneletšego.

“Morago ga dinyakišišo, monna yoo o ile a swarwa gomme o tšwelela pele ga kgorotsheko ya Northam ka Labone,” a realo.

Ledwaba o re maphodisa o re go ka swarwa bagononelwa ba bangwe  ge dinyakišišo di tšwela pele.