Mogononelwa yo a lokolotšwego ka peile ka lebaka la go sepetša dikoloi tša go utswiwa go ya Zimbabwe o golegilwe gape 

Mogononelwa yo ga bjale a lego ka ntle ka peile ka lebaka la go leka go tsentšha koloi yeo e utswitšwego ka bohwirihwiri ka Zimbabwe o swerwe gape.

 

Mogononelwa yo o swerwe a leka go sepetša sefatanaga sa go utswiwa mollowaneng wa Beitbridge.

 

Sehlopha sa go Latišiša sa Profense ya Limpopo, se šoma gotee le balekane ka bona ba hweditše sefatanaga seo se utswitšwego sa boleng bja R400,000 ka Mošupologo.  

 

Mokolonele Malesela Ledwaba ore maphodisa ba ile ba latelela tshedimošo ya gore sefatanaga sa go utswiwa go tšwa profenseng ya Gauteng se be se sepetšwa ka Limpopo go ya Beitbridge.

 

Ledwaba ore sehlopha sa beya sefatanaga seo leihlo go fihlela se bonwa tseleng ya R521 ka ntle ga Vivo.

 

“Sefatanaga se sešweu sa Toyota Corolla Cross se ile sa thibelwa, gomme dinyakišišo tše di utollotše gore go begilwe gore e utswitšwe ka Brooklyn kua Pretoria mafelelong a beke.”

 

 “Mootledi wa monna wa mengwaga ye masomepedi senyane o golegilwe lefelong la tiragalo. Mogononelwa o be a filwe peile ke kgorotsheko ya Maseterata ya Polokwane morago ga go swarwa ga gagwe ka Moranang ngwagola ka lebaka la go otlela koloi ya go utswiwa ya Toyota Hilux GD6 go ya Musina,” a tlaleletša Ledwaba

 

Tsheko, ka taba yeo, e rulaganyeditšwe go ba ka la 28 Phupu 2025 kgorong ya tsheko ya Selete ya Polokwane.

 

Mogononelwa o tla tšwelela pele ga Kgorotsheko ya Maseterata ya Senwabarwana ka Laboraro, la 25 Mosegamanye 2025.

 

O  lebane le ditatofatšo tša go otlela sefatanaga seo go gononwago gore se utswitšwe. Ledwaba o boletše ga pe gore go na le kgonagalo ya gore peile ya gagwe e ka phumolwa ka ge a gatakile mabaka a yona.