Terama ya Muvhango e fihla mafelelong

Lekgotlakgašo la Afrika Borwa (SABC)  le batšweletši ba Muvhango ba netefaditše gore rerama ya TshiVenda e fihla mafelelong.

Karolo ya mafelelo ya Muvhango e tla gašwa ka la 8 August 2025.

Motšweletšiphethiši wa Muvhango Duma Ndlovu yo ga bjale a lebanego le melato ya bomenetša bja motšhelo bja R26m o re pontšho ye e file sebaka go polelo yeo e hlokomologilwego yeo e fetogilego ye nngwe ya maleme ao a ketekwago kudu ka Afrika Borwa bjale. “E bile tokelo le tlhompho go hlola dinako go yelevision moo maleme ao a kgaphetšwego thoko a bego a le bogareng bja ona ka moka,” Ndlovu o boletše.

Mohlankedimogolophethiši wa sehlopha sa mošomo sa Video Entertainment ka SABC Lala Tuku o okeditše ka gore: “Mo e nyakilego go ba mengwaga ye 30, Muvhango e bile pilara ya mananeo a SABC2 le karolo ye e ratwago ya histori ya thelebišene ya Afrika Borwa.Go feta terama fela, Muvhango e bile mmotšwapele wa polelo, setšo, boitšhupo le boikgantšho bja setšhaba;go hlohleletša, go thabiša, go ruta le go kopanya batheeletši go ralala le Afrika Borwa.”

 “Ge re dutše re laelana ka lerato go pontšho ye, SABC2 e katološa ditebogo tša yona go batšeakarolo ba ba ineetšego le sehlopha ka fase ga boetapele bja Duma Ndlovu. Go feta tšohle, mokero o leboga dimilione tša babogedi le barati ka go theeletša ka Mošupologo o mongwe le o mongwe go fihla ka Labohlano mengwageng ye 28 ye e fetilego. Ri a livhuwa,” a realo Tuku.