Moetapele wa Zion Creationist Church o re o nyaka diteko tša madi di dirwa go netefatša gore ke yena mang
Ka Mogale Mohale
Moetapele wa Zion Creationist Church, Michael Serepo ya o tsebegago ka leina la Barnabas Shego Lekganyane o ntšhitše sa mafahleng.
Se ke ka morago ga gore kereke ya Zion Christian Church (ZCC) go la Moria, Limpopo e hwetše taelo kgahlanong le kereke ya gagwe, mme ya hlaloša gore kereke ya Serepo ga se karolo ya ZCC.
Tše di tšwelela ka morago ga mabarebare a Serepo a gore ke yena morwa wa moetapele wa ZCC, His Grace Bishop Dr. BE Lekganyane le gore kereke ya gagwe ke karolo ya ZCC.
Mmoleledi wa ZCC, Moatshe Ngoepe o re Lekganyane o hweditše taelo kgorongkgolo ya Pretoria ka kgwedi ya Phupu 2024 yeo e ganetšago Serepo go apara moaparo wa sedumedi gammogo le maswao a ZCC kopanong tša gagwe tša kereke.
“Taelo yeo e thibela Serepo go ipitša Maditobane Barnabas Lekganyane le go tlogela go šomiša maina ao go tšweletša le go foraforetša batho gore ke yena morwa wa Lekganyane,” gwa realo Ngoepe.
Serepo o re taelo yeo e dumeletšwe ntle le tsebo ya gagwe. “Taelo yeo e tšwele nna ke se gona,” a realo.
O re se se gatakile tokelo ya gagwe ya go hwetša theeletšo yeo e sa tšeyego lehlakore mme ga se a hwetše monyetla wa go ntšha sa mafahleng.
O re maswao a kereke le dithuto tša kereke ya gagwe di ikemi ebile di ikgethile. “Leswao la go swana le naledi, leeba le dithapo tšeo di šomišwago kerekeng yaka ke tša sedumedi tšeo di tletšego le lefase ka bophara,” a realo.
Serepo o re go fedišwa ga pukwana ya gagwe ya boitsebišo ke kgoro ya Merero ya Selegae ga go molaong.
“Pukwana yaka ya boitsebišo e fedišitšwe ka mabaka ao a hlokago bohlatse ao a tlišitšwego ke ZCC ntle le dinyakišišo gammogo le go nkabela monyetla wa go iphetolela,” a realo.
O re o nyaka gore go diriwe diteko tša madi magareng ga gagwe le Bishop Lekganyane go rarolla dipego tša gore ke yena mang.
“Re tšeya magato a semolao go thibela taelo yeo e se go molaong, le go šireletša tokelo tšaka le tša kereke gammogo le maloko go matšhošetši,” a realo.
