Kgoro ya tsheko e laeditše Boy Mamabolo go tlogela go šomiša Facebook go ya go ile

Leloko la Palamente la maloba mokgatlong wa ANC, Boy Mamabolo o thibetšwe go šomiša Facebook.

Kgoro ya godimo ya tsheko ya Polokwane e ntšhitše taelo yeo ka Labobedi, 15 Mosegamanye gore Mamabolo a tloše akhaonte ya leina la gagwe letlakaleng la Facebook mme a tlogele go phatlalatša dipego tša go senya leina la meyara wa masepala wa Polokwane, John Mpe.

Moahlodi wa motšwa o swere, Sune du Plessis o laeditše Mamabolo go tlogela go phatlalatša diswantšho go ba dikgatišo tša Mpe le ba lapa la gagwe mafarahlahleng a dikgokaganyo go etša WhatsApp, Facebook, X, Instagram le tšedingwe.

Moahlodi o thibetše Mamabolo go tlogela go tlaiša, go romela melaetša go ba go ikgokaganya le go tšhošetša Mpe ka tsela efe kapa efe.

Du Plessis o laeditše gape gore akhaonte ya Facebook yeo e bitšwago ka leina la Boy Mamabolo (Bua Kolobe) e tlošwe goya go ile.

Mamabolo o laeditšwe gape go lefa ditefelo tša kgoro ya tsheko molatong wo.

Taelo ye e tla ka morago ga gore Mpe a ye kgorong ya tsheko ka dipego tša gore Mamabolo o latofatša yena le mongwaledi wa ANC Limpopo Reuben Madadzhe ka go šomiša bošaedi lenanego la palo ya palamente, mme se sa dira gore a se ye palamenteng.

Efela Mamabolo o re o hlophilwe ke makala a mmalwa go ya ka molaotheo wa melao ya dikgetho, mme a hwetša dikgetho tšeo di lekanego go ba ka gare ga palo ya profense go ya go bosetšhaba.

O išitše mokgatlo kgorong ya tsheko molatong wo, mme o ile go kwagala kgorong ya godimo ya tsheko ya Johannesburg ka la 1, Lewedi.

Ka morago ga se, mokgatlo o ile wa latofatša Mamabolo ka go inaganela a le tee le go etiša dinyakwa tša gagwe pele.

Ka Laboraro, 30 Moranang, Mpe o ile a tšeya magato kgorongtsheko ya Polokwane, a phara Mamabolo ka molato wa tshenyo ya leina la gagwe ebile a nyaka gore a mo lefe R8 millione. Molato wo o tšwela pele.