Meetse a noka ya Limpopo River ga a na kotsi

Meetse a noka ya Limpopo River a ka šomišwa.

Se ke ka morago ga gore meetse a noka ye a fetoge mmala go ya go talamorogo.

Seemo se se tlogetše badudi ba gakanegile ka ge ba tshepile go nwa meetse ao ebile ba tanya le dihlapi.

Ka morago ga diteko tšeo di dirilwego ke masepala wa selete sa Vhembe, masepala o netefatša gore meetse ao ga a na bo kotsi.

Mmoleledi wa masepala, Moses Shibambu, o re mmala wa talamorogo o bakilwe ke bolele. “Efela, tekolo ya meetse e tlo tšwela pele beke yenngwe le yenngwe go netefatša gore meetse ga se a šilafale,” a realo.

Go fetoga ga mmala wa meetse go ile gwa tlogela badudi ba go dula kgauswi le noka ye ba boifa, ba ipotšiša ka seemo le go hlweka ga meetse a.

Ba be ba dumela gore noka ye e ka ba e šilafaditšwe ke selo seo se ka beyago maphelo a bona kotsing.

Tsakane Mabala (40) o re ba tshepile noka ye bjalo ka mothopo wa bona. “Re ya leboga ge meetse ao a se kotsi gore re ka a šomiša ka gore re be re tseetšwe,” a realo.

Ba re ba leboga masepala ge o šomile ka lebelo go lekola noka ye. Samson Ngobeni (31) o re ba tla kgona go tanya dihlapi ntle le go boifa.

“Re be re boifa gore go fetoga ga meetse go ka bolaya dihlapi ra palelwa ke go ditanya ka gore re phela ka tšona. Ga bjale re tla tšwela pele ka go lokologa,” a realo.

Balemi le bona ba re ba lokologile ka ge ba šomiša meetse a dipolaseng tša bona.