Batho ba lesomepedi ba hlokofetše morago ga kotsi ye šoro

Batho ba lesomepedi ba hlokofetše ka morago ga kotsi ye šoro yeo e akaretšago thekisi le theraka tše pedi.

Kotsi yeo e diregile tseleng ya R81 motseng Ga-Sekgopo ka ntle ga Modjadjiskloof ka Sontaga, 28 Lewedi. Bašomi ba gare ba dira dinyakišišo go hwetša seo se hlotšego kotsi yeo e tlogetšego malapa a mantši a le mahlokong kudu ka lebaka la go lahlegelwa ke batho bao ba ba ratago.

Tonakgolo ya Limpopo, Ngk Phophi Ramathuba o re kotsi ye e mo kwešitše bohloko bjo bogolo. “Ditaba tša kotsi ye di kweša bohloko kudu, segolo ge re nagana ka batswadi le malapa ao a amegilego. Mmušo wa profense o ema le malapa nakong ye ye thata, gomme re ikemetše go ba fa thekgo yeo e nyakegago,” a realo.

Bahlapetše ba tšhoganetšo le dihlopha tša phološo di be di šomela lefelong la kotsi ka Sontaga, mme tsela e butšwe gape bošego gare ka Mošupologo ka morago ga gore e tswalelwe di iri tše mmalwa.

Ramathuba o kopane le malapa ao a lahlegetšwego ke maloko a bona ka Mošupologo, 29 Lewedi bookelong bja Pietersburg, moo go dirilwego tshepedišo ya go hlatha ditopo.

Kgoro ya Dinamelwa le Tšhireletšo ya Setšhaba e boletše gore e tla tšwela pele go fa dipoelo tša dinyakišišo.

Ramathuba o hlohleleditše baotledi go otlela ka kelohloko. “Kotsi ye e bohloko ebile e re gopotša bohlokwa bja tlhokomelo ye ntši mebileng ya rena,” a realo.