Motšwa kgolegong o kgopela thušo

Ka Mogale Mohale

Motšwa kgolegong, Norman Sello ga a ipšhine bophelo mme o re o hloka thušo.

 

Monna yo wa mengwaga ye 50 go tšwa Ga-Mashabela ka ntle ga Jane Furse, Limpopo o tšwele kgolegong ka parole ka Phuphu 2024 ka morago ga molato wa go thuba ka lapeng.

 

O hweditše dilo di fetogile ge a fihla gae. O re ga a na phaphoši ya borobalo ka lapeng la gabo moo a dulago le mmagwe gammogo le bana ba gabo ba ba hlano mme o gapeletšega go robala ka phaphošing ya bodulo.

 

“Ga ke lokologe mo ke robalago gona ka gore ga kena sephiri. Ga ke kgoni go khutša ka gore ge o mongwe a tsoga, lenna ke swanetše go tsoga,” a realo.

 

O re o kgonne go hwetša lefelo mme o kgonne go thoma go aga phaphoši ya gagwe. “Ke kgonne go nyaka ditena ka thoma go aga. Efela phaphoši e pala go fela ka gore ga kena tšelete ya go reka didirišwa tša go aga ka ge ke sa šome,” a realo.

 

Norman o re o kgopela Mosamariah wa kgaugelo go mo thuša go fetša go aga phaphoši ya gagwe. “Le ge nka hwetša dilo tša go dira mokhukhu di tla loka. Ke hloka fela moo nka beyago hlogo,” a realo.

 

O re o hloka thušo gore a kgone go phetha pitšo ya badimo ba gagwe ka ge a le tseleng ya go thwasa.

 

“Ga ke kgoni go phetha merero ya badimo ge ke le ka gae ka ge e le badumedi. Ke beile dilo tša badimo baka ka ntle, kgakala ka gore ke dula le badumedi. Go ba boima ge pula e falala,” a realo.

 

O re o ke phidiša ka go epa dihlare tša setšo thabeng. “Ke di rekišetša dikgaka tšeo di boifago goya thabeng. Ke ka fao ke kgonago go reka dijo, efela tšhelete yeo ke ye nnyane gore ke kgone go feleletša phphoši yaka. Le ge ke leka go boloka tšhelete ke ya palelwa.” A realo.

 

O re batho ba se ke ba mo boifa ka gore o tšwa kgolegong. “Ke leka go fetola bophelo bjaka, ke ka fao ke hlokago thušo,” gwa realo Norman.