Palo ya mahu ao a hlotšego ke mafula ka EC e hlatlogetše go 97
Palo ya mahu ao a hlotšwego ke mafula ao a senyago ka Kapa Bohlabela e hlatlogetše go 97.
Se se tla morago ga gore ditopo tše pedi tša bašemane ba mahlalagading di hwetšwe ka Mthatha ka Sontaga.
Go ya ka hlogo ya go tsoma le go phološa ya Gift of the Givers, Ahmed Bham, ditopo tše pedi di bonwe ke modudi yo a ilego a ikgokaganya le maphodisa.
Mmoleledi wa mmušo wa profense Khuselwa Rantjie o boletše gore go tšwa go ditopo tšeo di hweditšwego, tše 86 di hlaotšwe ke ba malapa, gomme ditshepedišo di a tšwela pele tša go hlaola ditopo tše di šetšego.
“Mmušo wa profense o rulaganya thekgo ye e feletšego ya poloko, go akaretšwa le bo bea bahu, ditirelo tša poloko, le go sepetšwa ga mašaledi mafelong a poloko ao a kgethilwego, ka thušo go tšwa go balekane ba go swana le AVBOB. ,” a realo Rantjie.
Ka ntle ga dipeakanyo tša poloko, mmušo wa profense o boletše gore o katološa mehuta ya go fapafapana ya thušo go malapa ao a hlokofaletšwego le bao ba hudušitšwego ka lebaka la masetlapelo a.
“Se se akaretša dithušo tša Thušo ya Leago ya Tlalelo (SRD) go tšwa go SASSA bakeng sa ditokišetšo tša poloko, di-hamper tša go rekiša dijo go tšwa go Interlink Express, le R5,000 ya thekgo ya ditšhelete go tšwa go Kgoro ya Thuto bakeng sa baithuti bao ba hwilego,” Rantjie o boletše.
O okeditše ka gore mmušo o file thekgo go bahu ba 26 bao ba bolokilwego go tloga ka Labone go fihla ka Sontaga.
Tonakgolo ya motšwa o tshwere ya Kapa Bohlabela, Mlungisi Mvoko o amogetše tema yeo e kgathilwego ke badudi ka go tšwela pele go dirišana le balaodi le go aba thušo ye e nyakegago mo nakong ye ya tlhohlo.
“Mmušo wa profense o ikemišeditše go akgofiša maitapišo a go netefatša gore ditšhaba tšeo di amegilego di thekgwa go aga maphelo a tšona a leswa,” a realo Mvoko.
Mafula ao a thomilego bekeng tše pedi tšeo di fetilego a tlogetše batho ba go feta 4,000 ba hloka magae go ralala le profense.
Go nyaka le go bušetša di tšwela pele go ralala le dilete tše di fapafapanego tšeo di amegilego.
