Makgolokgolo a mašole a SANDF ao a tšwago DRC a tla goroga ka Air Force Base Waterkloof lehono

Sehlopha sa bobedi sa mašole a Afrika Borwa a 257 ao a tšwago ntweng ka Democratic Republic of Congo se tla fihla Air Force Base Waterkloof ka Tshwane lehono.

SANDF e tsebišitše go fihla mo go tlago ga sehlopha sa bobedi sa mašole ao a boago go tšwa thomong ya SADC ka SAMIDRC.

Mmoleledi wa SANDF, Rear Admiral Prince Tshabalala o boletše gore sehlopha se se rulaganyeditšwe go kotama kua Air Force Base Waterkloof magareng ga iri ya boraro le iri ya bohlano mathapameng a Sontaga. 

“Go boa gae mo ga dikgato ke karolo ya go gogela morago mo go rulagantšwego ga SANDF lefelong la thomo. Ge a boa, mašole a tla feta lenaneong la go tloša mašole la maemo, leo le akaretšago ditlhahlobo tša maphelo, thekgo ya monagano, le ditirelo tša kopanyo,” a realo Tshabalala.

Mašole a rometšwe ka fase ga thomo ya Setšhaba sa Tlhabollo ya Borwa bja Afrika (SADC) yeo e rometšwego nageng ye e hlasetšwego ke ntwa ka Dibatsela 2023 go thuša go bušetša khutšo le tšhireletšo ka seleteng.

 SADC e fedišitše thomo ya yona ya sešole ka DRC ka morago ga gore mašole a yona a 17 a bolawe ke mašole a M23 ka Goma.

Sehlopha sa boraro le sona se letetšwe go boela Afrika Borwa ka Mošupologo thapama.