Moahlodi Ratha Mokgoatlheng o kgopetše tshwarelo ka go phatloga ga gagwe kgorong ya tsheko

Moahlodi Ratha Mokgoatlheng, yo a okametšego tsheko ya polao ya rakgwele wa maloba Senzo Meyiwa o kgopetše tshwarelo ka go phatloga ga gagwe kgorong ya tsheko bekeng ya go feta. 

Moahlodi Mokgoatlheng o boletše dipolelo tše mmalwa ka medumo ya ka fase ga semorafe bekeng ya go feta.

Mokgoatlheng o kgopetše tshwarelo “go tšwa pelong” a re tsela yeo a itshwarago ka yona e thulana le tlhago ya gagwe. Bekeng ya go feta, Mokgoatlheng o laeditše kgalefo kgorong ya tsheko morago ga go kwa gore ramolao  Charles Mnisi o ngwaletše mongwaledi wa gagwe, a kgopela go lokollwa ditshepedišong ka Mošupologo go tšea karolo go Comrades Marathon mafelelong a beke.

“Go na le selo se tee seo ke swanetšego go se fetitša;  ke na le bonnete bja gore ka moka ga rena re badile dikuranta. Ke swanetše go rarolla taba ye. Sa mathomo ke nyaka go bolela gore, ke na le mengwaga ye 26 ke le pankeng, bjalo ka moahlodi wa motšwaotshwere, le bjalo ka moahlodi. Ga se nke ka itshwara ka tsela yeo ke dirilego ka yona (ka Labone). Ke bile mengwaga ye 30 bjalo ka ramolao pele ke eba moahlodi,” moahlodi o boletše le batho ka kgorong ya tsheko.

“Mosadi waka le yena, yo ke bego ke nagana gore o a ntšhaba, o mpoditše gore ke swanetše go kgopela tshwarelo go Afrika Borwa ka moka ka ge ke le yo mobe go feta boramolao bao go bonagalago ba utswa ditšhelete tša bareki ka taba ya RAF (Road Accident Fund). O be a bala kuranta ka letšatši le lengwe ka taba ya gore go bonagala boramolao (ba utswa go bareki) gomme ba hloka mmala, ba utswitše mo e ka bago R1.5 billion ya R1.5 billion.” Ditšhelete tša RAF tšeo e lego tša bareki.

O okeditše ka gore le yena o latofaditšwe ka semorafe. “Ke nyaka go bolela ka selo se tee goba tše pedi ka nna bjalo ka motho ntle le go ba ramolao. Ke goletše ka ntlong ya Moses Kotane. Nelson Mandela o be a tlwaetše go tla ka gae, Walter Sisulu, gaešita le Robert Sobukwe pele a kgaogana le ANC (African National Congress). Tate o be a amega bjalo ka leloko la ANC le Mokgatlo wa Makomonisi. O be a tla nyamišwa ge a ekwa gore ke mokgetho wa semorafe,” a realo.

Banna ba bahlano ba seka  kgorongkgolo ya tsheko ya North Pretoria polaong ya Meyiwa. Balatofatšwa ba re ga ba ipone molato.