Lekgotla leo le lwelago bogoši bja Balobedu le re le tlile go lwantšhana le sephetho sa go fega dikoma

Ka Mogale Mohale

Dintwa tša bogoši di tšwela pele go aroganya lapa la ga Modjadji gammogo le setšhaba sa Balobedu.

 

Se se tla ka morago ga gore lekgotla la Modjadji Royal Council ka fase ga boetapele bja Kgošigadi Masalanabo Modjadji VII le fege dikoma sehleng se ka ge ba lokiša moletlo wa go hlahlamiša Kgošigadi Masalanabo bjalo ka moetapele wa setšhaba sa Balobedu ka kgwedi ya Lewedi.

 

Kgošigadi Masalanabo o lemogilwe semmušo bjalo ka moetapele wa nnete setulong sa bogoši bja Balobedu ka kgwedi ya December 2024 ke Presidente Cyril Ramaphosa.

 

Ka ditiragalo tše, mmoleledi wa Modjadji Royal Nation ka fase ga boetapele bja malowe wa Kgošigadi,  Prince Lekukela Modjadji, Ronnie Moroatshehla o re ga gona moletlo wa hlahlamišo ya kgošigadi yeo e rulagantšwego ngwagaeng wo.

 

“Ba lapa le lekgotla la ga Modjadji ba netefatša gore ga gona hlahlamišo ya kgošigadi yeo e rulagantšwego ngwaga wo. O hlahlamiša bjang motho ntle le ba lapa la gagwe?” a realo.

 

Moroatshehla o re ba ile go lwanthana le sephetho sa go fega dikoma.

 

“Re nyaka go hlatholla gore sephetho sa go fega dikoma ga se amane le rena, efela se tšwa go sehlopha seo se eteletšwego pele ke Mathole Motshekga yo e le go motseneledi,” a realo.

 

O re ba ikgogela morago go ditiragalo tše tša go hloka nnete tšeo di se nago kgokagano le setšo sa bona.

 

“Ga gona molao wo o rego ge go na le moletlo wa hlohlamišo, dikoma di swanetše di fegwe,” a realo.

 

O re ba ile go kopana ka Labone, 19 Phupu go boledišana ka tsela ya go tšwela pele mabapi le go fegwa ga dikoma.

 

Modulasetulo wa lekgotla la Balobedu Royal Council, Ngk David Mogale o re hlahlamišo ya Kgošigadi Masalanabo e tšwela pele ka kgwedi ya Lewedi.

 

“Re dumela sephetho sa Kgošigadi Masalanabo sa go fega dikoma ka lebaka la ditokišo tša hlahlamišo ya gagwe,” a realo.

 

O re nako ya Modjadji Royal Nation ya go etela pele setšhaba a fedile ge Kgošigadi Masalanabo a tshwara mengwaga ye 18.

 

“Ka fao, o na le maloka a go laola setšhaba sa Balobedu. Sehlopha sa Moroatshehla se ile kgorong ya tsheko mme re sa emetše go bona gore go tla direga eng,” a realo.