Professor Mahlo Mokgalong o laela Unibesithi ya Limpopo ka morago ga mengwaga ye 22
Ka Mogale Mohale
Motlatšamokhanselara wa Unibesithi ya Limpopo, Professor Mahlo Mokgalong o rola modiro ka morago ga mengwaga ye 54.
Se ke ka morago ga gore Ngk Jeffrey Mabelebele a kgethwe bjalo ka motlatšamokhanselara o moswa.
Ga re go mengwaga ye 54, Mokgalong o thwetšwe bjalo ka motlatšamokhanselara ka 2003 mme a hlankela unibesithi mengwaga ye 22.
Se se mo dira motlatšamokhanselara wa mathomo ka Afrika Borwa wa go šoma nako ye telele. O ile go rola modiro wa gagwe semmušo ka kgwedi ya Pherekgong 2026.
Nakong ya ge a e ba leloko la unibesithi ka 1971, o tšere karolo mešomong ye mmalwa. O thomile ka go ba monyakišiši, a ba morutiši, a okamela lefapha go fihla a tlo thwala bjalo ka motlatšamokhanselara ka 2003.
Modulasetulo wa unibesithi, Pandelani Nefolovhodwe o re boetapele bja Mokgalong bo bopile bohwa bja unibesithi.
“Unibesithi e leboga Mokgalong ka ge a hlanketše setheo se ka bokgwari go thoma ka ge e be e le moithuti go fihla a šoma,” a realo.
O re nakong ya ge a thoma mošomo, Mokgalong o thulagane le bontši bja mathata a ditšhelete. “Lehono re ya ikgantšha gore o tlogela setheo se se le maemong a kaone a ditšhelete, go na le maikarabelo a tshepedišo ya taolo mme dithuto di ya thelela,” a realo.
Nakong ya ge e le motlatšamokhanselara, o tšweleditše baalogwa ba bongaka ba 605, 5 281 ba legoro la masters mme a tliša le sekolo sa bongaka. O kgonne go hwetša unqualified audit mengwaya ye 11 ya go latelana.
Nefolovhodwe o re lekgotla le na le tshepo go motlatšamokhanselara o moswa, Mabelebele yo a tšweletšego ka morago ga dihlokolo le ditshepedišo tša go thwala tša go fapafapana.
“Mabelebele o kgahlile lekgotla ka pono ya gagwe yeo e sepedišanago le moeno wa unibesithi ya go hwetša ditharollo tša Afrika. O laeditše gape kwišišo ya gagwe ya projeke ya unibesithi ya dithuto le go ithuta, go nyakišiša gammogo le dikgokaganyo le setšhaba,” a realo.
O re ba laletša setšhaba ka moka sa unibesithi le batšeyakarolo go amogela Mabelebele ka borutho bjalo ka motlatšamokhanselara o moswa.
