Mekgatlo ya dipolotiki e butše melato ya bomenetša kgahlanong le meyara wa masepala wa Polokwane, John Mpe
Mekgatlo ya ActionSA le Build One South Africa (BOSA) e butše melato ya bomenetša kgahlanong le meyara wa masepala wa Polokwane, John Mpe.
Modulasetulo wa ActionSA profenseng ya Limpopo, Victor Mothemela o butše molato setišing sa Polokwane ka Labobedi, 29 Mosegamanye, mola moetapele wa BOSA profenseng, Timothy Maluleke, mmogo le moetapele wa selete sa Capricorn, Ngako Setjie, ba butše molato go Special Investigation Unit (SIU) ka Mošupologo, 28 Mosegamanye.
Victor Mothemela o re ba ka se lebelele ge batho bao ba nago le dikgokagano tša dipolitiki ba senya bokamoso bja ikonomi bja MaAfrika Borwa ka lebaka la dikgwebo tša kantle.
“Ka fase ga boetapele bja meyara Mpe, masepala o file dikhamphane tša bafaladi dithentara tša mašeleng a go fihla R200 millione. Dikhamphane tše dingwe di tswalana le bašomi ba masepala,” a realo.
Timothy Maluleke o re kgato ya bona e latela matshwenyego a go fiwa ga dithentara go bagwera le go re go rekilwe ntlo tše tharo mo nakong ya dikgwedi tše tharo.
“Ditokomane ka moka tše di amago ditatofatšo tše di rometšwe, gomme SIU e kholofegile ka seo e se rometšwego,” a realo.
O re meyara o dumetše gore dithentara di filwe khamphane ya Zimbabwe makga a mantši. “Gape, go na le maikemišetšo a go ngwalela komiti ya Dithulaganyo le komiti ya Ditšhelete tša Setšhaba mabapi le ditaba tše,” a realo.
Mmoleledi wa maphodisa a Limpopo, Brigadier Hlulani Mashaba o re mokhomišinare wa maphodisa a profense, Lieutenant-General Thembi Hadebe o lemogile molato wo o butšwego ke ActionSA mabapi le dithentara tše sa latelwago molao kgahlanong le masepala wa Polokwane.
“Molato wo o amana le dithentara tša go tloga ka Pherekgong 2023 go fihla ka Mosegamanye 2025 kgahlanong le bašomi ba maemo a godimo ba masepala,” a realo.
Mashaba o re go ya ka mongongoregi, dithentara di filwe ka tsela yeo e sego ya semolao le ka go se latele molao wa Preferential Procurement Policy Framework Act le wa Broad-based Black Economic Empowerment Act mo nakong yeo e boletšwego.
“Ka lebaka la bogolo bja ditatofatšo tše, molato wo o fetešeditšwe go Directorate for Priority Crime Investigation (DPCI) go dira dinyakišišo le go o šoma ka botlalo,” a realo.
