“Morwedi wa ka o ile a lwa go fihlela manala a gagwe a robega.”

Olorato Mongale, yo a bolailwego bekeng ya go feta, o bolokilwe ka Bloemfontein, Free State ka Sontaga. 

Ba lapa, bagwera, bašomi mmogo le bahlankedi ba mmušo ba ile ba kgobokana ka Holong ya Motse ya Mangaung ka Bloemfontein tireling ya poloki Olorato (30). 

Ge a efa polelo tireling ya poloko, mmago Olorato, Poppy Mongale o boletše gore o ile a tšhoga kudu ge a ekwa gore o ile a dumela go tsena ka koloing ya bagononela polaong ya gagwe ka ge ebe ele mo yo a lego šedi kudu.

“Tše ke tše dingwe tša dilo tšeo di ntšhošitšego ka yena, eupša ke a tseba gore o ile a lwela bophelo bja gagwe. Ge ke mmona lefelong la go bolokela bahu la mmušo, ke ile ka bona gore morwedi wa ka o ile a lwa. O ile a lwa go fihlela manala a gagwe a robega.”

Motlatšatona wa maphodisa Polly Boshielo o boditše ba lapa gore maphodisa a ka no ba a sa kgona go thibela lehu la ngwana wa bona eupša a ba kgonthišetša gore yo mongwe wa ba bolayi Philangenkosi Makhanya o bolailwe morago ga go thuntšhana le maphodisa ka Laboraro. Boshielo o rile maphodisa a ka se bo pate go fihlela mogononelwa wa bobedi Bongani Mthimkhulu a golegwa. 

 “Go Poppy le lapa, hwetšang khomotšegi ka go tseba gore ka lebaka la moya wa Olorato, Makhanya a ka se sa tshwenya basadi na Afrika Borwa.”

O ile a tšwela pele a re maphodisa ba hweditše ditokomane tše ntši tša boitšhupo tša basadi ba go fapana mo go Makhyana. “Re dumela gore ye ke sindikheiti yeo e nepišago basadi ka mafelong a mabenkele. Re nyaka Mthimkhulu a hwile goba a phele,” a realo Boshielo.