Mmolai wa Sindiso Magaqa o ipone molato
Yo mongwe wa banna ba bane bao ba latofatšwago ka go bolaya mongwaledipharephare wa peleng wa ANC Youth League Sindiso Magaqa o ipone molato.
Sibusiso Ncengwa o ile a dumela pele ga kgorokgolo ya tsheko ya Pietermaritzburg gore o thuntšhitše Magaqa. O ile a šupa ka monwana molaodi wa peleng wa mmasepala, ramotse wa peleng le raditaba bosenying bjo.
O boletše gore mathomong ba lefilwe R120,000 go bolaya Magaqa gomme ba tshepišwa le thendara ya R1m, eupša o hweditše ge a le kgolegong gore molaodi wa peleng wa mmasepala wa Umzimkhulu Zweliphansi Skhosana le ramotse Mluleki Ndobe ba lefile R600,000 gore Magaqa a bolaweka.
Magaqa o hlokofetše bookelong morago ga go thuntšhwa ka go lalelwa kgauswi le legae la gagwe ka Umzimkhulu ka borwa bja KwaZulu-Natal ka Phupu 2017.
Ka nako yeo, bagwera ba gagwe le boradipolotiko ka yena ba ile ba bolela gore polao ya gagwe e hlotšwe ke go tšweletša nyanyeng bomenetša mpshafatšwa ga Holo ya Segopotšo ya Umzimkhulu.
Ncengwa, Sbonelo Myeza, Mlungisi Ncalane le Mbulelo Mpofana ba swerwe gomme ba latofaditšwe ka polao ya Magaqa ka la 25 Moranang 2023.
Mmoleledi wa Bolaodi bja Botšhotšhisi bja Bosetšhaba ka KZN Natasha Ramkisson-Mara o boletše gore Ncengwa o dumeletše kgorongkgolo ya tsheko ya Pietermaritzburg gore o thuntšhitše Magaqa.
“O ile a dumela gape ka maitekelo a polao ya Jabulile Msiya, Nonsikelelo Mafa, le Nceba Mazongolo. Ncengwa o ile a tšwela pele go dumela tshenyo ya dithoto ka maikemišetšo a mabe dikoloing tša Magaqa le ba bangwe le go swara sethunya ka moo go sego molaong,” Kara o boletše.
O okeditše ka gore Ncengwa o hlalošitše ka botlalo ditiragalo tšeo di lebišitšego lehung la Magaqa le ditirišano tšeo a bilego le tšona le balatofatšwa mmogo le yena.
“Dikamogelo tša gagwe di ile tša amogelwa ke mmušo, gomme dikamogelo tše di ile tša lekana le go ipona molato. Kgorotsheko e hweditše Ncengwa molato go ya ka dikamogelo tša gagwe.”
Molato kgahlanong le Ncengwa o bušeditšwe morago go fihla ka la 30 Mosegamanye 2025 gore a ahlolwe. Molato kgahlanong le Myeza le Mpofana o tla boela kgorong ya tsheko ka la 19 Mosegamanye 2025 gore ba fiwe molato wo mofsa ka ge taba ya bona bjale e arogantšwe le ya Ncengwa.
