Didirišwa tša dipapadi tša bofora tšeo di gwahlafatšago ekonomi ya profense di sentšwe
Ka Mogale Mohale
Didirišwa tša dipapadi tša bofora tšeo di šomago ka ntle le molao mo mabenkelengpotlana di gwahlafatša ekonomi ya Limpopo.
Se se bakwa ke gore didirišwa tše ga se di ngwadišiwe, ka fao di hlola letseno leo le sa laolegego leo le šomišwago go tsenya tšhelete ditirong tša bosenyi.
Mo mengwageng ye meraro e fetilego, Boto ya Dipapadi ya Limpopo e kgonne go thopa le go senya didirišwa tše diketekete tše di bego di šomišwa go raloka dipapadi tša bofora.
Ka Laboraro, 23 Mosegamanye, boto mmogo le kgoro ya Tlhabollo ya Ikonomi, Tikologo le Boeti ya Limpopo (LEDET) ba sentše didirišwa tše tša bofora tše 373 kua Polokwane, yeo e thopilwego mo nakong ya dikgwedi tše 36 bjalo ka karolo ya lenanego la go fediša dipapadi tša bofora.
Modulasetulo wa boto, Gregory Makoko o re dipapadi tša bofora di thuša go tšweletša tšhelete yeo e šomišwago mafelong a diokobatši, go rekiša batho, gammogo le go senya ekonomi ya mafelo ao a hlabologago le metse magae.
“Ga re sa tlo dula re lebeletše bao ba hweditšwego ba le karolong ya dihlopha tša bosenyi tšeo di senyago ekonomi ya Limpopo ba hwetša kotlo ya bofefo. Bosenyi bjo bo tsenya bana dipapading tša bofora, bo senya setshwantšho sa lekala la dipapadi ebile bo fetola profense gore e be legae la bosenyi,” a realo.
Makoko o laeditše ka go tiiša gore beng mabenkelepotlana bao ba hwetšwago le didirišwa tše ba ka lebana le go tswalelwa ga dikgwebo tša bona mmogo le go amogwa ditumello tša go sepediša mabenkele go ya go ile.
Molekgotlaphethiši wa LEDET Tshitereke Matibe, o re ba belaetša ke gore bao ba tšwelago pele go šomiša didirišwa tše mafelong a bona ba amogela ka lethabo kotlo yeo e le go magareng ga R500 le R1 500.
“Kotlo ye ga e boima ka gore bao ba šomišago didirišwa tšeo ba dira letseno le le ntši kudu beke ka beke,” a realo.
Matibe o re go swanetše go tšewa magato a tiilego a go otla gammogo le kotlo tša godimo ge e le gore profense e nyaka go fenya ntwa ye ya dipapadi tša bofora.
