Badudi ba dula ka poifo ka morago ga go hwetša lebitla le epilwe

Ka Mogale Mohale

Maphodisa a nyakišiša molato wa tshenyo ya lebitla gammogo le setopo.

Se ke ka morago ga gore lebitla le hwetšwe le epilwe mme diriparipa tša lepokisi la mohu di phatlaletše dirapeng tša motse wa Mavhunga ka ntle ga Thohoyandou, Limpopo ka Mokibelo, 12 Mosegamanye.

Tiragalo ye ya go tšhoša ya go se tlwaelege e lemogilwe ka morago ga gore leloko la lapa le hwetše mogala go o mongwe wa setšhaba go tsebiša gore go na le batho bao ba epago lebitla.

Leloko leo le ile la leba dirapeng mme la hwetša lebitla le epilwe, ebile diriparipa tša lepokisi di phatlaletše. Bagononelwa ba be ba tsene ka monga wa seloko.

Mmoleledi wa maphodisa Colonel Malesela Ledwaba o re ba ile ba bitšwa mme ge ba fihla mabitleng ba hwetša lebitla leo le epilwe.

“Molato wa tshenyo ya lebitla o butšwe setišing sa Mphephu mme yo a na go le tshedimošo ya seo se diregilego tiragalong ye ya go tšhoša a ka ikgokaganya le monyakišiši, Lirovha Mashudu Fortune go 072 943 5260 go ba setiši sa kgauswi.

Tiragalo ye e tlogetše badudi ka poifo, ba boifela tšhireletšo ya mabitla a maloko a bona dirapeng. Ba re tiragalo ye ga se e tlwaelege mme ba nagana gore e amana le boloi.

Mokhomišinare wa maphodisa a Limpopo, Lieutenant-General Thembi Hadebe o makaditšwe ke tiragalo yeo e diragetšego dirapeng.

O laeditše maphodisa go šomiša didirišwa tšeo di le go gona go tsomana le bagononelwa.