Monna o bolaile mosadi wa gagwe lebenkeleng

Monna wa mengwaga ye 45 o bolaile mosadi wa gagwe wa mengwaga ye 40 ka go mo thuntšha ka sethunya, a gobatša molaodi wa lebenkele gomme morago a ipolaya ka Namakgale Shopping Complex, Phalaborwa seleteng sa Mopani ka Sontaga bošego, 28 Lewedi.

Maphodisa a re kotsi ye e diregile ka gare ga lebenkele moo ba hweditšego batho ba bararo ba rapaletše fase ka gare ga bodiba bja madi ba na le dintho tša di kgobadi.

Mmoleledi wa maphodisa a Limpopo, Brigadier Hlulani Mashaba o re dinyakišišo tša mathomo di laetša gore monna o latetše mosadi wa gagwe ka lebenkeleng, moo a be go a leka go iphihla gona.

“O mo šetše morago go fihla ka kantorong ya molaodi wa lebenkele, gomme a thuntša ga bedi moo a gobaditšego molaodi,” a realo.

Mashaba o re ka morago o gogetše mosadi wa gagwe ka ntle, a mo hlaba ka thipa makga a mantši gomme a mo bolaya ka sethunya pele a ipolaya.

“Sethunya se se šomišitšwego se hweditšwe e le sa go se be molaong mme nomoro ya sona e phumotšwe. Maphodisa a tšere sethunya, le thipa lefelong la tiragalo,” a realo.

Molaodi yo a gobaditšwego o išitšwe sepetlele gore a hwetše kalafo. Maina a bao ba hlokofetšego a tla tšweletšwa morago ge ba malapa a bona a tsebešitšwe.

Mokhomišinare wa maphodisa a Profense, Lieutenant-General Thembi Hadebe o galefile mme o kgala kotsi ye, a e hlaloša bjalo ka madimabe a ditlamorago tše bohloko tša kgatelelo ya ka malapeng.

“Ke kgopela maloko a setšhaba ao a itemogelago mathata a dikamano tša bona gore ba nyake thušo le thekgo, e sego go dira dikgaruru,” a realo. Maphodisa a dira dinyakišišo tše pedi tša polao le e tee ya go leka polao.