Palo ya bao ba amegilego kotsing magareng ga theraka le sefatanaga sa maphodisa e rotogetše go senyane

Palo ya bao ba hlokofetšego ka morago ga kotsi ye e diregilego ka Labone, 14 Phato tseleng ya R101 magareng ga Mokopane le Mookgophong, e rotogile go fihla go senyane.

Kotsi ye e akareditše theraka le sefatanaga sa maphodisa seo se bego se nameditše bagolegwa nakong ya ge di tla thulana.

Mathomong go begilwe batho ba šupa bao ba hlokofetšego, e lego lephodisa le tee le bagolegwa ba tshela. Eupša ka Labohlano, 15 Phato bagolegwa ba bangwe ba babedi bao ba bego ba amogetšwe bookelong ba ile ba hlokofala, gomme palo ka moka ya rotoga go fihla go senyane.

Mmoleledi wa maphodisa a Limpopo, Brigadier Hlulani Mashaba o re bagolegwa ba bangwe ba sa le bookelong go hwetša kalafo.

Mokhomišinare wa maphodisa a profense, Lieutenant-General Thembi Hadebe o rometše mantšu a hlobošo go malapa a bao ba hlokofetšego mme a lakaletša bao ba gobetšego gore ba fole ka pela.

O gateletše gape gore maphodisa a Afrika Borwa a ikgafile ka botlalo go dira dinyakišišo tše tseneletšego go bona lebaka la nnete leo le bakilego kotsi ye ye šoro.