Mantšu a seopedi sa go tuma, Shandesh The Vocalist a galefešitše badudi ba Botswana 

Ka Mogale Mohale

Seopedi sa go tuma Nelly Machethe (21) yo a tumilego ka leina la Shandesh The Vocalist o galefešitše badudi ba naga ya Botswana.

 

Se ke ka morago ga gore seopedi se sa mmino wa Lekompo se bolele ka naga le badudi ka mantšu ao e kego o nyefola badudi ba Botswana matlakaleng a dikgokaganyo.

 

Go mantšu ao, Shandesh The Vocalist o re go boima go hwetša sefatanaga sa Mercedes Benz nageng ya Botswana ka ge go tletše difatanaga tša Mazda.

 

O boletše gape gore go ba le sefatanaga sa Haval ke leemo ka Botswana mme a re mapai a leina la Nike a ka dira gore motho a boye Afrika Borwa a khumile.

 

Mantšu ao a ile a galefiša badudi ba Botswana mme bontši bja bona ba ipiletša gore Shandesh The Vocalist a iletšwe go etela naga ya bona mengwaga ye 2.

 

Ba re o nyaditše ngaga ya bona le ge e le gore ba mo amogetše ka moya wa borutho.

 

Shandesh The Vocaist o ile a kgopela tshwarelo mme a re o rata Botswana ebile o sa nyaka go kwa maitemogelo a naga ye.

 

Molaodi wa gagwe, Miss Mogashoa o re mantšu a Shandesh The Vocalist a tšerwe ka moya o mongwe. “O tsebega bjalo ka motho wa metlae mme ka nako yenngwe metlae yeo e hlathollwa ka tsela yenngwe.

 

“Shandesh The Vocalist o na le lerato go batho ba Botswana mme se se bonagala ka ketelo ya gagwe kgafetša kgafetša. O rata setšo le dijo tša naga ye,” a realo.

 

Miss Mogashoa o re Shandesh The Vocalist o kgopela tshwarelo gomme o netefaletša badudi ba Botswana gore o rata le go hlompha naga ya bona ebile o leboga thekgo yeo ba mo fago yona.

 

Ka tsela ya gagwe ya go kgopela tshwarelo, o ile go šoma le diopedi tša Botswana.