Go utswa ga meetse ke yenngwe yeo e hlokišago badudi meetse

Go utswa ga meetse ao a išwago mafelong a dipolase ke lebaka le legolo leo badudi ba Kgapane go la Ga-Modjadji ba sa lebanego le mathata a go hloka meetse.

Yeo ke polelo ya masepala wa Greater Letaba nakong ya kopano le setšhaba ka Mošupologo, 22 Lewedi. Kopano ye e akareditše masepala wa selete wa Mopani, Lepelle Northern Water le badudi ba Kgapane morago ga dingongorego tša hlokego ya meetse le ditirelo ka kakaretšo.

Badudi ba boletše gape ka go senywa ga meetse mafelong a go hlatswa difatanaga, di dirišwa tša kgale tše nnyane tša go iša meetse ka malapeng le tšedingwe tšeo di dirilwego ka asbestos gammogo le go phatloga ga didirišwa tša go sepetša meetse go la Masakaneng.

Bašomi ba hlalošitše ditharollo tše mmalwa go akaretša go tlošwa ga didirišwa tšeo di išago meetse dipolaseng, go fetola didirišwa tša kgale tša go sepetša meetse ka tše kgolo, go lokiša melete ya meetse, go thwala ditsebi tša lokiša methopo ya meetse, le go aga methopo ya meetse ya godimo mafelong a godimo bjalo ka Mesopotamia le Extension 5.

Leloko la khansele, Sefufi Maditshego o hlohleleditše badudi le masepala go šoma mmogo go lwa le bao ba utswago meetse. Meyara wa masepala wa Greater Letaba, Dagma Mamanyoha o re ge ba sa šome ka maatla go fediša go utswa ga meetse, ba ka se kgone go rarolla mathata a hlokego ya meetse.

Masepala wa Mopani o kgopetšwe go bušetša ditswalelo tša meetse go la Kgapane. Bašomi le bona ba tla etela Politsi Water Plant go lekola maemo a go pompa ga meetse le go dira ditekolo tšedingwe toropong ya Kgapane.

“Re leboga badudi ka karolo yeo ba e ralokago ka gore karolo yeo e bontšha lerato la hlabollo ya Kgapane,” a realo.