Mohlape wa ditlou tšeo di hudugago di ka hlola kotsi Seleteng sa Vhembe — Badudi ba eletšwa go ntšha mahlo dinameng

Badudi mollwaneng wa selete sa Vhembe ba eletšwa go dula ba ntšhitše mahlo dinameng ka ge go na le ditlou tšeo di fetago tikologong ya bona.

Se se bakwa ke mohlape o mogolo wa ditlou tše di fetago 50, tšeo di bonagalago di feta mafelong a diphoofolo le dipolase tša temo, go akaretša le mafelo a bodulo.

Go huduga ga ngwaga le ngwaga ga ditlou di e etšwa Botswana le Zimbabwe, ka nako tše dingwe Kruger National Park e direga ka dikgwedi tša Mosegamanye, Phato, Lewedi le Diphalane.

Mafelo ao a amegilego ke Pont-drift, Musina, Tshenzhelani, Ha-Gumbu, Tshikondeni, Makuya, Mtititi, Masisi, Punda-Maria le Tshamutumbu.

Mmoleledi wa kgoro ya Tlhabollo ya Ekonomi, Tikologo le Boeti, Zaid Kalla o re go ba gona ga ditlou tšeo di hudugago feela ka lebaka la go nyaka dijo, ka nako tše dingwe go felela ka tshenyo ya dithoto mafelong a diphoofolo tša naga le dipolase tša temo kgauswi le Pont-drift.

“O re mafelong a mangwe moo dipolase di lego tše nyenyane, ditlou di kgona go feta mafelong a bodulo le ditoropo gore di fihle moo go nago le phulo yeo e di loketšego goba bodulo bja nakwana,” a realo.

O re ka bomadimabe, mohlape wa ditlou wo o tshetšego mollwane wa Zimbabwe ngwaga wo o bontšhitše bogale bjo bogolo, mohlomongwe ka lebaka la dihlorišo tša tikologo le ditlhaselo ka batho, go akaretša le hlokego ya go šireletša dinamane tša tšona.

“Tiragalo ya lehu e diregile mo Tshamutumbu ka lebaka la bogale bjo. Badudi ba mafelo ao a boletšwego ba eletšwa go se batamele diphoofolo tšeo,” a realo.

Kalla o re diphoofolo tša naga di dula di huduega maikutlo mme di fetoga kapela, kudukudu ge di ekwa di sa bolokega.

“Kgoro e tshwenyegile kudu ka dipego tšeo di bontšhago gore setšhaba se šala ditlou morago, gammogo le bahlapetši ba diphoofolo ge ba leka go laola seemo,” a realo.

O re ditiragalo tšeo ga di na boikarabelo ebile di kotsi kudu. “Re hlohleletša setšhaba gore se se leke le gatee go latela, go tšea diswantšho goba go tsenelela ge ditlou le bahlapetši ba diphoofolo ba sepela,” a realo.

Badudi ba eletšwa go se tsene nageng ye bulegilego go nyaka dikgonye tša mollo goba dilo tše dingwe ge ditlou di lego gona.