Go fetoga ga mmala a meetse a noka ya Limpopo go talamorogo go tšhoša badudi

Ka Mogale Mohale

Badudi ba go dula kgauswi le noka ya Limpopo ba boifela maphelo a bona.

 

Se ke ka morago ga gore meetse a noka ye a fetoge mmala go ya go talamorogo.

 

Seemo se se tlogetše badudi ba gakanegile ka ge ba tshepile go nwa meetse ao ebile ba tanya le dihlapi. Ba re ba ipotšiša ka seemo le go hlweka ga meetse a.

 

Ba dumela gore noka ye e ka ba e šilafaditšwe ke selo seo se ka beyago maphelo a bona kotsing.

 

Tsakane Mabala (40) o re ba tshepile noka ye bjalo ka mothopo wa bona. “Nako le nako ge re hloka meetse re tla nokeng ye. Ga re tsebe gore re ile go leba kae ge noka e le ka tsela ye,” a realo.

 

Ba re ba ile go hlaka ge mmušo o ka se hwetše tharollo ka pela. “Ge seemo se ka se rarollege ka pela, ba bangwe ba badudi ba ile go gapeletšega go nwa meetse a ka ge ba hloka tšhelete ya go reka go bao ba rekišago,” gwa realo Mabala.

 

Seo se šilafaditšego meetse ga se tsebege ka se sebaka mme bao ba itemogelago malwetše ka morago ga go a šomiša, ba hlohleletšwa go hloka thušo.

 

Samson Ngobeni (31) o re ba boifa go tanya dihlapi. “Re tshwenywa ke gore ga re tsebe bokotsi bja šilafatšo ye, mme ge dihlapi di ka hwa re ile go bolawa ke tlala ka gore re hwetša letseno ka tšona,” a realo.

 

Seo se hlotšego phetogo ya mmala ga se tsebege efela se ka amana le bolele, khemikhale go ba diminerale tša hlago.

 

Badudi ba hlohleletšwa go šomiša meetse a mangwe go ba go bidiša meetse ao a noka pele ba ka a šomiša. Mmoleledi wa masepala wa selete sa Vhembe, Moses Shibambu o kgopetše badudi gore ba ntšhe mahlo dinameng tšomišong ya meetse a noka ye ka ge a le talamorogo.

 

“Masepala o ile go dira diteko go lekola go hlweka ga meetse mme badudi ba tla tsebišwa ge diteko di dirilwe,” a realo.