Senokwane seo se tlaišitšego setšhaba sa Nebo se ahloletšwe mengwaga e fetago e 200 kgolegong
Kgorokgolo ya tsheko ya Polokwane e ahloletše mosenyi eo a bego a tlaiša ditšhaba tša Nebo le Hlogotlou go dula kgolegong mengwaga ye 222.
Lesley Morwamashobe Mohlala (33) o ile a swarwa ka molato wa go kata ka Mopitlo 2018 gomme a tingwa bail.
Eupja, ka Diphalane 2018, Mohlala o ile a tšhabela maphodisa ge a be a išwa Kgolegong ya Witbank. Mmoleledi wa maphodisa a Limpopo Colonel Malesela Ledwaba o boletše gore nakong ya ge Mohlala a be a tšhaba, o ile a tšwela pele ka go tlaiša setšhaba.
O ile a hloriša bahlankedi tšhireletšo meagong ya mmušo, dikliniki, diteišene tša sephethephethe, diofisi tša Mešomo ya Setšhaba le mafelo a mangwe a go fapafapana. Mohlala o be a amoga bahlankedi ba tšhireletšo dithunya le dilla thekeng.
O ile a tšwelapela ka go tlaiša batšwa sehlabelo ba gagwe ka go ba amoga dilo tša bona go akaretšwa diselefouno le tšhelete. Seo se ile sa hlola moya wa poifo ditšhabeng tšeo di amegilego.
Ka la 14 Moranang 2023, Mohlala o ile a swarwa gape moo a bego a khutile gona ka Jane Furse. O ile a latofatswa ka melato e seswai ya go thuba.
“Bohlatse bja DNA bo ile bja mo amantšha le melato ye mebedi ya tlaleletšo ya go kata yeo e diregilego ge e be e le mogononelwa yo a sa tsebjego.Ka la 16 Moranang 2023, o ile a ahlolelwa mengwaga ye mebedi kgolegong thwii ka lebaka la go tšhaba kgolegong ya molaotšhireletšo,” Ledwaba a realo.
O ile a dula kgolegong ntle le peile ka morago ga kahlolo ye.
“Botšhotšhisi bjo bo atlegilego bo hlotšwe ke mošomo wa dinyakišišo wo o tseneletšego wa Sajene Kabelo Seele Shokane go tšwa go Sehlopha sa go Latela sa Nebo le Jane Furse seo se nyakišišitšego melato ka moka ya go thubja le Sajene Sekgapinya Alfred Phahlane go tšwa yuniting ya Groblersdal Family Violence, Child Protection and Sexual Offenses (FCS) unit yeo e nyakišišitšego melato ka moka ya go kata,” a tlaleletša Ledwaba.
Sajene Kabelo Seele Shokane go tšwa go Sehlopha sa go Latela sa Nebo le Jane Furse seo se nyakišišitšego melato ka moka ya go thubja le Sajene Sekgapinya Alfred Phahlane go tšwa yuniting ya Groblersdal Family Violence, Child Protection and Sexual Offenses (FCS)
Mohlala o bonwe molato ka melato ye 23. Kgorotsheko e laetše gore go golegwa mengwaga ye 10 go molato wa 1 ga go sepele ka nako e tee le melato ya 2 go ya go 25, ka kahlolo ya fasefase ya mengwaga ye 15 kgolegong go melato ya 2 go ya go 25.
