Tsela ya Nelson Mandela Drive magareng ga Vermikuliet le makopano a Disteneng e tla tswalelwa matšatši a mabedi

Baotledi ba ka se kgone go šomiša tsela ya Nelson Mandela Drive magareng ga Vermikuliet le makopano a Disteneng.

Se ke ka lebaka la gore tsela ye e tla tswalelwa matšatši a mabedi. Tswalelo ye ya nakwana e rulagantšwe go hwetša sebaka sa mešomo ya bohlokwa ya kago leporogong la Sand River go tloga ka Mokibelo mesong, 23 go fihla ka Sontaga, 24 Phato ka 6pm.

Mmoleledi wa masepala wa Polokwane, Thipa Selala o re ba tsebiša baotledi, banamedi, badudi le batšeya karolo ka moka bao ba amegago ka tswalelo ye ya tsela.

O re mešomo e tla akaretša go tsenya metheo ka crane, le go thuba dikarolo tše dingwe tša leporogo.

“Ka nako ye, sephethephethe magareng ga Polokwane, Seshego, Moletjie le dinaga mabapi seo se šomišago Nelson Mandela Drive go ya le go boya se tla amega,” a realo.

O re ditsela tše dingwe tšeo di ka šomišwago e tla ba tsela ya Vermikuliet go ya Dendron Road, Polokwane Drive le Thembi Hani Drive go boela Nelson Mandela Drive go ya le go boya.

“Tsela tše dingwe e tla ba go tšwa West Street go ya Matlala Road, Zebediela Street le Nelson Mandela Drive go ya le go boya. Ditsela tša Leeto la Polokwane go ya le go boya Seshego di tla fapantšhwa ka nako ye, di šomiša Nelson Mandela Drive go ya Vermikuliet, Dendron Road, Polokwane Drive le Thembi Hani Drive le ge di boela morago,” a tšwela pele.

Selala  o boletše gore ba kgopela tshwarelo ka ditšhitišo tšeo di ka hlolwago ke tswalelo ye gomme ba kgopela tšhomišano magareng ga baotledi, banamedi, borakgwebo le badudi le gore ba se fele pelo.

“Mešomo ye ke karolo ya lenaneo la masepala la go tsosološa meago, le le rulagantšwego go netefatša gore mebila e bolokegile go badiriši ka moka,” a realo.