Ditatofatšo kgahlanong le molatofatšwa mmogo wa Thabo Bester di gogilwe morago

Ditatofatšo kgahlanong le mošomi wa peleng wa G4S Motanyane Masukela (53) yo e lego molatofatšwa wa bohlano ya molatong wa go tšhaba ga Thabo Bester kgolegong ka 2023 di gogetšwe morago.

Se se tiišeditšwe lehono nakong ya theeletšo ya pele ga tsheko kgorong ya tsheko ye kgolo ka Bloemfontein ka Labobedi moo Bester, moratiwa wa gagwe wa peleng Ngaka Nandipha Magudumana le basekišwa ba bangwe ba bahlano ba tšweletšego gona.

Motšhotšhisi wa mmušo Advocate Amanda Bester o irile: “Ditatofatšo kgahlanong le molatofatšwa wa bohlano di gogelwa morago.Rea mo lokolla gomme a ka sepela ka khutšo.”

Advocate Bester ga se a fa lebaka la go gogela morago, gomme go be go se na dikganetšo

Moahlodi Mareena Opperman o ile a bolela gape ka ditaba tša boemedi bja molao bja tatago Magudumana Zolile Sekeleni. 

Sekeleni yo gape e lego molatofatšwa mmogo tabeng ya go thuša Bester go tšhaba kgolegong, ga se a thwala ramolao go tloga ka Pherekgong. 

O boditše kgorotsheko gore ga a na tšhelete ya ramolao gomme kgopelo ya gagwe ya Legal Aid e gannwe ka Pherekgong. 

Opperman o lemošitše gore ge Sekeleni ka palelwa ke go hwetša ramolao, kgorotsheko e tla tšwela pele ka tsheko go sa šetšwe maemo a gagwe a molao.

Molato yo o bušeditše morago go la 19 Lewedi gore e theeletšwe taolo ya molato, ka letšatšikgwedi la tsheko leo le beilwego go ba la 21 Phupu Kgorongkgolo ya Tsheko ka Bloemfontein.

Opperman o itše: “Letšatšikgwedi la tsheko le lona le dula le swana.”