Kganya o fa bana ba basetsana mengato ka dikolong

Ka Mogale Mohale

Bontši bja makgarebe ba ya dikolong ntle le mengatwana ya lehlapo.

 

Go fetola se, molaodi wa In Touch Community Development, Kganya Ramoshaba-Bbenkele o boni hlokego ya go thuša makgarebe ao a hlokago gore ba se palelwe ke goya dikolong ka nako ya lehlapo.

 

Ka se sebaka, Kganya o ka gare ga lesolo la go sepela a kgoboketša mengatwana mme ae abela makgarebe ao a hlokago. Ka se, o ipiletša go batho gore ba kgethe dikolo tšeo a tlago go di abela mengatwana yeo.

 

O re dipoelo tša go feta tša marematlou di mo hlohleleditše go tšwela pele go thuša makgarebe gore a tšwele pele go tsena dikolo.

 

Nepo ya gage ke go matlafatša makgarebe gore ba kgone go ya dikolong ka nako ya lehlapo.

 

“Re kwišiša seemo sa ekonomi seo naga ya rena e le go ka gare go sona, mme bontši bja basadi ba palelwa ke go reka dinyakwa go swana le mengatwana,” a realo.

 

O re lesolo le la go buša seriti se hlohleleditšwe ke hlokego ya go šogana le mathata ao a tlišwago ke lehlapo go makgarebe ao a hlakago.

 

O re o nyaka go bona seriti sa makgarebe se sa nyefolwe. “Ba swanetše go bolela ka boitshepo mme ba se tshwenyege ka dithuto tša bona.

 

“Nepo yaka ye kgolo ke makgarebe ao a tsenago dikolo, basadi bao ba dugo metse magae le batho ka moka bao ba palelwago ke go reka mengatwana ya lehlapo,” a realo.

 

O re ba na le lesolo le lengwe moo ba ilego go abela batšofe mapai le dijo kgwedi ye ya Phupu.

 

“Re mema ditšhaba ka moka, batswadi le batseya karolo go re thuša ka go hlatha dikolo tšeo di tshwanelwago go hwetša dikabelo tše,” a realo.

 

O re bao ba nyakago go ba thuša ka dikabelo go ba go kgetha dikolo tšeo di ka hwetšago dikabelo tše, ba ka ikgokagana le bona go 015 297 4511/12.