Kabelo Prince Monethe o ahloletšwe bophelo bja gagwe ka moka kgolegong ka morago ga go kata mokgekolo wa mengwaga ye 68
Mokati, Kabelo Prince Monethe (33) o ahloletšwe kgolegong bophelo bja gagwe ka moka ka lebaka la go kata mokgekolo wa mengwaga ye 68.
O ahlotšwe ke kgorotsheko ya Mahwelereng kua Mokopane, Limpopo ka Labone, 17 Mosegamanye.
Tiragalo ye ya bošoro e diregile mesong ya 16 Manthole 2023 motseng wa Ga-Chaba, Mapela ge mokgekolo yo a tsošwa ke lešata le legolo la lebati la ka kitšheneng.
O rile ge a leka go lekola gore go direga eng, monna yo a sa tsebjwego a mo swara ka morago, a mo lahlela fase gomme a mo kata.
Morago ga tlhaselo yeo, modiradibe o gapeleditše mokgekolo yo gore a mmulele lebati. Ge ba etšwa, mokgekolo a bona moagišane mme a hlaba lešata a kgopela thušo.
Seo se dirile gore molatofatšwa a tšhabe, efela moagišane o ile a lemoša setšhaba mme a begela gape le maphodisa ka tiragalo yeo.
Mmoleledi wa maphodsa a Limpopo, Colonel Malesela Ledwaba o boletše gore bohlatse bjo bohlokwa bo hweditšwe ka morago ga gore molatofatšwa a tlogele borokgo bja ka gare lefelong la tlhaselo, mme badudi ba hlatsela gore ke bja Monethe.
“Se se dirile gore Monethe a swarwe letšatši leo ka morago ga tlhaselo,” a realo.
Ledwaba o re molato o ile wa diega mathomong ka lebaka la diphapano tša go hlatha molatofatšwa, ka fao ga se wa tsenywa kgorongtsheko ka pela.
“Efela bohlatse bja DNA bo ile bja netefaitša gore molatofatšwa o amana le tiragalo yeo ya kato, gomme molato o ile wa tsošwa gape mme wa feleletšwa ka Labone, 17 Mosegamanye,” a realo.
Mokhomishenare wa maphodisa a Limpopo Lieutenant-General Thembi Hadebe, o retile maetekelo a setšhaba le dinyakišišo tša bona tšeo di tseneletšego.
“Kahlolo ya bophelo ka moka e romela molaetša o kwagalago gore re ka se dumelele tlaišo ya maloko a setšhaba, kudukudu batšofe ba rena,” gwa realo Hadebe.
