Kereke ya Zion Christian Church e swere kopano ye kgethwa ya ngwaga o moswa wa 2025/2026 go la Moria
Kereke ya Zion Christian Church (ZCC) e swere kopano ye kgethwa ya ngwaga o moswa wa 2025/2026 go la Moria ka ntle ga Polokwane.
Kopano ye e thomile ka Laboraro, 3 Lewedi mme e tla fela ka Laboraro, 10 Lewedi. Kopano ye ya ngwaga le ngwaga ke ye nngwe ya ditiragalo tše kgethwa kudu mo go balatedi ba ZCC, mme e goga dimillione tša maloko go tšwa mafelong a go fapafapana mo Afrika Borwa le dinaga mabapi.
Ke nako ya mpshafatšo, go itekola le go gola semoya ge maloko a nyaka tšhegofatšo ya ngwaga wo o tlago.
Mmoleledi wa kereke, Moatshe Ngoepe o netefaditše gore magato a tšhireletšo a šetše e beilwe gore kopano e sepele gabotse. O gateletše gore barekiši le borakgwebopotlana ba tla thibelwa go rekiša pele ga Moria.
“Ye ke nako ya kgolo ya sephethephethe le koketšogo ya mosepelo wa batho mo tikologong ya kereke. Ka lebaka leo, maloko a setšhaba go akaretša le balatedi ba ZCC ba eletšwa go hlompha mekgwa ya polokego ditseleng.
“Ba obamele melao ya sephethephethe le maswao a tsela, ba hlomphe ditsela tša basepela ka dinao le go ba le pelo telele le botho lebakeng la polokego ya setšhaba,” gwa realo Ngoepe.
Ngoepe o gateletše gore sephetho sa kereke ga se kgahlanong goba go lwantšhana le dikgwebopotlana, eupša se swanetše go šireletša maloko le setšhaba sa tikologo.
“Kopano ye ye kgethwa ya ngwaga o moswa ke tiragalo ya semoya ye e tseneletšego, gomme maloko a eletšwa go nepa megopolo go thapelo, botee le mpshafatšo ya tumelo ge ba tsena ngwageng wa 2026,” a realo.
