Batho ba senyane ba lobile maphelo a bona mafuleng a EC
Batho ba senyane ba hlokofetše ka Kapa Bohlabela ka lebaka la mafula ao a hlotšwego ke maemo a boso a šoro.
Mmoleledi wa mmušo wa Eastern Cape Khuselwa Rantjie ore ditopo tše tshela di hweditšwe motseng wa Decoligny ka Mthatha, mola setopo sa bošupa se hweditšwe kua Tsolo kgauswi le noka ya Bedlana ka Labobedi. Ditopo tše dingwe tše pedi di hweditšwe ka Labobedi mantšiboa.
Rantjie thekisi yeo e ile ya gogolwa ke meetse ka Labobedi mesong e rwele bana ba sekolo e hweditšwe. Go ya ka Rantjie, thekisi e hweditšwe e sena motho gomme ba nyakana le dipoto tšwa bana bao ba bego ba e nametše.
“Mmušo wa Profense o nyamišitšwe ke ka tsela eo batho ba lobilego maphelo ka goba. Re rata go romela matshidiso go malapa a bao ba hlokofaletšwego. Maemo a boso a šoro le ona a hlotše tshenyo ye kgolo go mananeokgoparara a ditsela, go hudušwa ga badudi, gomme, ka bomadimabe, tahlegelo ya maphelo,” Rantjie o boletše.
O okeditše ka gore dihlopha tša tlhakodišo le tšona di sa nyaka thekisi ya pese ye nnyane yeo e rwelego bana ba sekolo yeo e ilego ya gogolwa ka Labobedi mesong.
Go ya ka Rantjies, Tonakgolo Oscar Mabuyane o rometše di-MEC ka profenseng go thekga Mmasepala wa Selete sa O.R Tambo maitekong a wona a go phološa badudi, go akaretšwa go netefatša kabo ya methopo ye e nyakegago.
Mmušo wa Kapa Bohlabela o boletše gore diyuniti tša taolo ya masetlapelo tša profense, ditirelo tša tšhoganetšo, le mebasepala ya selegae di dirišana go tsepamiša mafelo ao a amegilego, go fa thekgo ya ka pela, le go bušetša ditirelo tše bohlokwa.
Mabuyane o letetšwe go etela setereke sa Mmasepala wa OR Tambo lehono.
