Bašemane le banna ba 26 000 ba bollotšwe mafelong a maphelo a mmušo profense ka bophara nakong ya kgwedi

Kgoro ya Maphelo ka Limpopo e feditše sehla sa lebollo la banna bao ba ithaopilego mafelong a maphelo ka katlego.

Se ke ka morago ga gore go bollwe banna ba 26 001 mafelong a maphelo a mmušo go ralala le profense go thoma ka di 20 Phupu go fihla ka di 19 Mosegamanye.

Sehla se se thakgotšwe ke Molekgotlaphethiši wa Maphelo, Dieketseng Mashego mafelong ao a fetago a 100 profense ka bophara. Lebollo le be le dirwa mahala mafelong a maphelo a mmušo.

Go ya ka dipalo, go bollotšwe bašemane ba 22 527 ba mengwaga ye 10 go fihla go 14 mme gwa bollwa banna ba 3 474 ba mengwaga ye 15 go ya godimo.

Lenanego le la lebollo ke karolo ya leano la mmušo la go fokotša kotsi ya phetetšo ya HIV ka thobalano le go godiša maphelo a banna. Lebollo le le netefaditšwe gore le kgona go fokotša kotsi ya go fetetša HIV ge go kopantšwe le ditsela tše dingwe tša thibelo.

Selete sa Capricorn se di etile pele ka palo ya 6 509, gwa latela Sekhukhune ka 5 324, Mopani e ngwadišitše 5 174 mme Vhembe le Waterberg di fihleletše 4 854 le 4 140 go ya ka tatelano.

Dipetlele tša Dilokong, Seshego le Lebowakgomo ke tšona di bollotšego batho ba ba ntši mme se sengwe le se sengwe se ngwadišitše dipalo tša go feta 1 000.

Molekgotlaphethiši Mashego o re ba thabišwa ka katlego ye. “Palo e kgolo ya bašemane le banna e bontšha gore setšhaba se tšere sephetho sa go hlokomela maphelo a sona. Re leboga ditlhopha tša maphelo, bahlagolegi le malapa ka go thekga maiteko a a phološago maphelo,” a realo.

Kgoro e hlohleletša batswadi le banna bao ba loketšego gore ba tšwele pele go ingwadiša lenanegong le gore ba bollwe mahala ngwaga ka moka mafelong a maphelo a mmušo mo Limpopo.

“Modiro wo o bolokegile, ga o tšeye nako mme o dirwa ke bašomi bao ba hlahlilwego ka bokgoni bjo bo nepagetšego mafelong ao a hlwekilego,” a realo.