Didirišwa tša barutwana tša elektroniki di utswitšwe sekolong sa godimo Burgersdorp

Ka Mogale Mohale

Barutwana ba ile go hlaka dithutong tša bona ge dikolo di bulwa.

 

Se ke ka morago ga gore mahodu a tsene ka sekolong sa godimo sa Burgersdorp ka ntle ga Tzaneen, Limpopo ka Laboraro, 2 Mosegamanye mme ba utswe tablets tše 300 gammogo le laptop ye tee tšeo di di šomišwago ke barutwana dithutong tša bona.

 

Mahodu a a kgonne go tsena ka sekolong ka go sega sedirišwa sa go boloka dilo. Diphaphoši tše tharo gammogo le laborotary di thobilwe.

 

Tiragalo ye e tlogetši batswadi le barutwana ba befetšwe ka ge se se ba bušetša morago, kudu bokamoso bja barutwana.

 

Motswadi (44) o re ba tshwenya ke gore dithuto tša bana ba bona di ile go šalela morago.

 

“Bana ba rena ba ile go hlaka mme se se ile go ama gampe dipoelo tša bona. Yo a dirilego se o na le pelo ye mpe ka gore o raloka ka bokamoso bja bana ba rena,” a realo.

 

Ba bangwe ba dumela gore tiragalo ye ke mošomo wa ka gare. “Sekolo se na le bašireletše ebile re be re nagana gore tablets tšeo di swere ke barutwana. Re holofela gore di tla nyakwa mme mahodu ao a swarwa,” gwa realo Simon Ramathoka (29).

 

Badudi ba hlohleletšwa go tlaleya seo ba se šolago go ba ge ba bona motho a leka go rekiša didirišwa tšeo.

 

Molekgotlaphethiši wa kgoro ya Thuto, Mavhungu Lerule-Ramakhanya o kgadile tiragalo ye ka bogale mme o re batswadi ba swanetše go tšeya maikarabelo a bana ba bona ka go tlaleya ditiragalo tšeo di se go molaong.

 

“Bosenyi ga bo dumelelege dikolong. Ge didirišwa tša thuto di utswa, se se bušetša naga morago ka gore barutwana ba ile go hloka didirišwa tša go ithuta,” gwa realo Lerule-Ramakhanya.

 

Mmoleledi wa maphodisa a Limpopo Brigadier Hlulani Mashaba o re ba nyakišiša molato wa bohodu bja kgwebo ka morago ga gore banna ba 4 ba go se tsebege ba hlasele bašireletši ba ba bedi.

 

“Ba ba kgokile ka dithapo mme ba utswa didirišwa tša thuto gammogo le tšedingwe,” gwa realo Mashaba.