Meyara wa Jo’burg Dada Morero o phologile tšhišinyo ya go hloka tshepo mola sepikara se tlošitšwe   

Meyara wa Johannesburg Dada Morero o phologile tšhišinyo ya go hloka tshepo yeo e tšweleditšwego ke DA ka Laboraro la di 25 Mosegamanye 2025.

DA e ile ya bea tšhišinyo yeo ka khanseleng, ya re kabo ya ditirelo e phuhlame ka fase ga boetapele bja Morero.  

Morero o phologile ge makhanselara a 144 a boutela kgahlanong le tšhišinyo ye, a 75 a e thekga mola a 43 a sa bouta. 

Mokhanselara wa ActionSA ka Johannesburg Nobuhle Mthembu o tlošitšwe bjalo ka Sepikara sa khansele ka tšhišinyo ya go hloka tshepo.

 Makhanselara a 212 a thekgile go tlošwa ga gagwe, mola a 48 a boutetše kgahlanong le tšhišinyo ye.

Mokgatlo wa Mthembu, ActionSA o ile wa ithibela go bouta ka ge bare boetapele bja Morero ga bo tshepege le gore ditirelo tša go swana le meetse, mohlagase, le mananeokgoparara di phuhlame.

Go tlošwa ga Mthembu go ra gore khansele ga e na sepikara, gomme e tla swanelwa ke go kopana gape go kgetha sepikara. 

Mo nakong ye, molaodi wa motse o tla okamela diboka gomme a bitša kopano e kgethegilego bakeng sa go kgetha seboledi se sefsa.