Monna o hweditšwe a na le dikgobadi mpeng ebile a epetšwe ka gare ga molete o mo nnyane

Maphodisa a Limpopo a thomile dinyakišišo morago ga gore setopo sa monna wa mengwaga ye 38 se hwetšwe se epetšwe ka gare ga molete o mo nnyane kgauswi le mabitla.

Setopo seo se hweditšwe ka Sontaga, 17 Phato motseng wa Bordeaux ka ntle Tzaneen. Se se latela morago ga gore badudi ba bege taba ye morago ga go kwa monkgo o mobe wo o tšwago ka sethokgweng kgauswi le ntlo ya kgale.

Ge maphodisa a fihla, ba hweditše badudi ba kgobokane tiragalong yeo. Setopo seo se hlathilwe gore ke sa Mboi Lawrence Rakgoale go tšwa motseng wa Ga-Madawa.

Mmoleledi wa maphodisa a Limpopo, Brigadier Hlulani Mashaba o re o epollotšwe mme a hwetšwa a na le dintho tšeo di bulegilego mpeng ebile a thomile go bola.

“Rakgoale o be a begilwe gore o timetše ka Mokibelo, 9 Phato morago ga go nyamela ga gagwe ka tsela yeo e sa kwišišagalego. Maphodisa a butše molato wa polao, le ge lebaka la polao le sa tsebjwe. Ga go motho yo a šetšego a swerwe,” a realo.

Mokhomishinare wa maphodisa a profense, Lieutenant-General Thembi Hadebe o kgadile ka bogale polao ye mme a kgopela setšhaba go šoma mmogo le maphodisa.

“Polao ye ye šoro e tshwenya kudu, mme re kgopela mang le mang yo a nago le tshedišo gore a tšwelele. Go šoma mmogo le setšhaba ke tsela fela yeo re ka kgonago go netefatša gore bao ba dirago bosenyi ba tlošwa setšhabeng,” a realo.

Mang le mang yo a nago le tshedimošo ye e ka thušago dinyakišišong o hlohleletšwa go ikgokaganya le monyakišiši, Sergeant Hudson Tshikavhi go 082 319 9742 le 08600 10111 go ba a etele maphodisa a kgauswi.