Sehlopha sa Concerned Citizens of Polokwane se ipeletša gore masepala wa Polokwane o beiwe ka fase ga bolaodi bja mmušo
Badudi ba go feta 100 ba gwantetše kantorong tša Tonakgolo Ngk Phophi Ramathuba ka Laboraro, 13 Phato ba nyaka gore meyara le molaodi wa masepala ba tlogele modiro.
Sehlopha sa Concerned Citizens of Polokwane (CCP) se nyaka gore meyara wa masepala wa Polokwane, John Mpe, le molaodi wa masepala, Thuso Nemugumoni ba tlošwe maemong a bona.
Se se latela ditatofatšo tša gore thentara ya R56 millione e filwe khampane yeo e amanago le molekane wa Nemugumoni wa gotšwa Zimbabwe ka tsela ye e sa latelago molao ka tumelelo ya Mpe.
Sehlopha se re go na le dithentara tše dingwe tše 28 tša go ja R724 millione tšeo di amanago le bahlankedi ba bagolo ba masepala, dikhamphane tša dinaga tše dingwe, le batho bao ba amanago le Mpe le Nemugumoni.
Mokgoboketše wa CCP, Thapelo Molepo o re ba nyaka masepala o bewa ka fase ga bolaodi bja mmušo. “Bao ba hwetšwago ba na le molato ba swanetše go lefa. Re holofela gore tonakgolo o tla tloša Mpe,” a realo.
Molepo o latofatša Mpe ka go rata bašomi ba dinaga tše dingwe go feta badudi ba Polokwane. O beile ka mohlala go thwalwa ga modudi wa Zimbabwe, Kennedy Chihota bjalo ka molaodi wa lefapha la meetse le kelelatšhila.
Morulaganyi wa CCP, Phasoane Mphahlele o re ga ba ganetše MaAfrika a mangwe, eupša ba kgahlanong le masepala ge o šomela feela ba mmalwa bao ba humilego legatong la badudi ba Polokwane.
“Mpe o fa bagwera ba gagwe menyetla ya dikgwebo. Re lapišitše ke batho bao ba šomelago mekotla ya bona mola batho ba rena ba sa hwetše ditirelo,” a realo.
Tše dingwe tša dinyakwa tša bona ke gore lekgotla la masepala le šwalalanywe, diprojeke tšeo di amanago le bomenetša di emišwe le gore tonakgolo a bitše kopano ya go bea masepala ka fase ga bolaodi.
“Masepala o na le methopo ye e lekanego ya go fa ditirelo, eupša methopo yeo e šomišwa gampe go thuša dikhamphane tša dinaga tše dingwe le bo rapolotiki,” gwa realo Mphahlele.
Ba file Molekgotlaphethiši wa Ditšhelete, Kgabo Mahoai legatong la Ramathuba, lengwalo la bona la dinyakwa.
Mpe o ile a araba gore o ganetša ditatofatšo tšeo mme a re ga di na motheo, di senya leina ebile di hlohleletšwa ke dipolotiki. O rile dikhamphane tšeo go bolelwago ka tšona di hweditše dikontraka ka tsela ya molao pele yena le Nemugumoni ba tsena mešomong ya bona.
“Molao ga o thibele dikhamphane tša dinaga tše dingwe go šoma le masepala, ge feela di latela melao ka moka le dinyakwa tša mmušo,” gwa realo Mpe.
