Komiti ya Taolo ya Bosetšhaba ya ANC e ganne kgopelo ya Modulasetulo wa profense ya Limpopo, Stan Mathabatha ya go tlogela mešomo ya gagwe ka gare ga mokgatlo
Komiti ya Taolo ya Bosetšhaba (NEC) ya ANC e ganne kgopelo ya Modulasetulo wa profense ya Limpopo, Stan Mathabatha ya go tlogela mešomo ya gagwe ka gare ga mokgatlo, gomme e laetše gore a rarolle taba ye le makala a profense.
Sephetho se se tšerwe nakong ya kopano ka Laboraro, 3 Lewedi moo lekgotlatherišo leo le be go le eteletšwe pele ke mongwaledipharephare wa mokgatlo, Fikile Mbalula le rerilego diteng tša lengwalo la Mathabatha le boetapele bja profense ya Limpopo.
NEC e bušeditše taba ye go komiti ya profense gore e rarollwe ka gare, gomme dipoelo di tsebišwe balaodi ba bosetšhaba.
Mathabatha o be a dirile kgopelo ya go tlogela mešomo ya gagwe ka Mošupologo, 1 Lewedi a tswalanya sephetho sa gagwe le “boitshwaro bjo bobe gammogo le go se latelwe ga maeeno ya ANC” dilo tšeo a di bonego dikopanong tša go kgetha baetapele ba dilete tša Vhembe le Waterberg.
O ngwadile gore sephetho sa gagwe o se tšere go boloka seriti sa gagwe le botshepegi. Kgato ye e kopane le ditsholo ka gare le ka ntle ga mokgatlo.
Mongwaledi wa profense wa Lekgotla la Baswa la ANC (ANC Youth League), Phineas Sebola o biditše kgato ya Mathabatha “go se be le sebete,” a bolela gore moetapele wa nnete o swanetše go rwala maikarabelo go na le “go tšhaba.”
Lekgotla la baswa le ile la mmotša gore a role modiro Palamenteng le boemo bja gagwe bja motlatšatona ge e le gore o tiišitše ka seriti sa gagwe.
