Tonakgolo Ngk Phophi Ramathuba o gana ditatofatšo tša bomenetša tšeo di amago yena le Molekgotlaphethiši Basikopo Makamu masepaleng wa Mogalakwena

Tonakgolo Ngk Phophi Ramathuba o ganne ditatofatšo tšeo di phatlaladitšwego matlakaleng a dikgokagano tša leago tša gore yena le Molekgotlaphethiši wa kgoro ya Pušo Tirišano, Bodulo bja Batho le Merero ya Setšo, Basikopo Makamu ba amega mererong ya bomenetša bjo bo akaretšago dimillione masepaleng wa Mogalakwena.

Ditatofatšo tšeo di bolela gore Tonakgolo Ramathuba le Molekgotlaphethiši Makamu ba laetše molaodi wa masepala, Morris Montengo Maluleka go saena ditefelo go dikhamphane tšeo di amanago le bona gammogo le go thwala maloko a bona.

Mmoleledi wa tonakgolo, Thilivhali Muavha o re ditatofatšo tše di thomile ka Mošupologo, 4 Phato letlakaleng la Facebook leo le bego le dirišwa ka leina la “Tshepo Ledwaba.”

Ka morago, letlakala leo le ile la phumolwa morago ga dinyakišišo tša mathomo tšeo di dirilwego ke masepala wa Mogalakwena. “Ka Labohlano, 15 Phato masepala o ile wa bula molato. Go tloga moo, ditatofatšo di ile tša fetetšwa go letlakala la X ka leina la @generalmkhwanaz,”a realo.

Muavha o re ditatofatšo tše ke maaka ebile di dirilwe ka maikemišetšo mme a gatelela gore balaodi ba masepala ba šoma ka go ikema ebile ga ba bege go baetapele ba profense ba dipolotiki.

“Lekgotla la masepala le balaodi ba tšona ba na le maikarabelo a bona. Tonakgolo goba molekgotlaphethiši ga ba na maatla a go fa balaodi ba masepala ditaelo tša mešomo, goba go dumelela ditšhelete,”a realo.

O gateletše gore tše dingwe tša ditšhelete tšeo di bolelwago di diragetše ka 2023, pele ga Tonakgolo Ramathuba a ka thoma modiro wa gagwe bjalo ka tonakgolo.

Taba ye e išitšwe go ba molao mme tonakgolo o kgopetše gore go nyakišišwe mo ditatofatšo tše di tšwago gona, gape go šireletšwe molaodi wa masepala wa Mogalakwena.

“Setšhaba se kgopelwa go se ele ditatofatšo tše hloko mme ba tšwele pele go tshepa boitshwaro bja bašomi ba setšhaba,” gwa realo Muavha.