Boinyana Andries Manokwane o ile go fetša bophelo bja gagwe kgolegong

Boinyana Andries Manokwane (47) o ahlotšwe kgolegong bophelo bja gagwe molatong wa go kata mosetsana wa mengwaga ye lesome.

O ahlotšwe ke kgorotsheko ya Burgersfort, Limpopo ka Laboraro la di 6 Phato.

Se se latela morago ga ge mmago ngwana a be a le lapeng motseng wa Mooihoek, Sekhukhune ka Sontaga, 29 Pherekgong 2020, ge a bitšwa ka pela ke motswala wa gagwe gore a ye sethokgweng sa kgauswi.

Ge a fihla moo, o hweditše morwedi wa gagwe le Manokwane ba dikaneditšwe ke setšhaba.

Go begwa gore Manokwane o hweditše mosetsana yo le bagwera ba gagwe ba babedi lebenkeleng gomme a ba fa R20, a ba goketša gore ba mo latele go fihlela ba fihla sethokgweng.

Mmoleledi wa maphodisa a Limpopo, Colonel Malesela Ledwaba o re Manokwane o ile a kata mosetsana yo mme a leka le go kata ba bangwe ba babedi. “Ge a sa le mo tirong yeo, leloko la setšhaba le ile la mo hwetša gomme la lemosa ba bangwe,” a realo.

Ledwaba o re maphodisa a biditšwe mme a hwetša Manokwane a swere ke setšhaba, gomme a išwa kgolegong.

“Molato o ile wa fetešetšwa go sehlopha sa tlaišego ya malapa, tshireletšo ya bana le ditiro tša tlaišego ya thobalano gore go dirwe dinyakišišo ka botlalo. Sergeant Mahlatse Mangoale o beilwe godimo ga molato wo,” gwa realo Ledwaba.

Manokwane o ile a tšwelela pele ga kgoro ya tsheko makga a mantši go fihla a fiwa beile ya R1 500 ka di 11 Pherekgong 2021.

Ka boikemišetšo bjo bogolo le modiro o mobotse wa dinyakišišo, Sergeant Mangoale o kgonne go beakanya molato wo o tiilego, mme se sa dira gore kgoro e mo hwetše molato, ya mo ahlolela kgolegelo bophelo bja gagwe ka moka.