Thuša maphodisa go swara gape basenyi ba ba kotsi

Maphodisa a Letsitele, kgauswi le Tzaneen ka Limpopo, a tsomana le banna ba bararo bao ba letetšego tsheko bao ba tšhabilego diseleng tša maphodisa ka Labobedi, la 24 Mosegamanye 2025.

Bagolegwa ba ile ba tšhaba ka morago ga iri ya bohlano mesong ye. 

Go ya ka mmoleledi wa maphodisa a Limpopo Colonel Malesela Ledwaba, go thwe bagononelwa ba bararo ba ile ba fenya maphodisa bao ba bego ba le mošomong gomme ba tšhaba ka maoto.

 “Dipego di laetša gore bagononelwa ba polao, Patrick Mbombi, Thabo Moye Makgopa, le Javas Mongwe ba hlalošwa bjalo ka ba kotsi ebile ba itlhamile,” Ledwaba o boletše. 

Mang le mang yo a nago le tshedimošo mabapi le moo bagononelwa ba lego gona o hlohleletšwa go ikgokaganya le Detective Colonel Mavis Shilubane go 082 469 0900 goba go ikgokaganya le seteišene sa maphodisa sa kgauswi.

Ledwaba o okeditše ka gore tshedimošo ka moka e tla swarwa ka sephiri.