MOPRESIDENTE RAMAPHOSA O TSHEDIŠITŠE MALAPA A BAO BA HLOKOFETŠEGO KOTSING YA PESE KA LIMPOPO

Mopresidente Cyril Ramaphosa o fetišitše matshidiso a gagwe go mebušo le badudi ba Zimbabwe le Malawi morago ga gore kotsi ya pese e fete le maphelo a batho ba 42 kgauswi le Makhado, Limpopo, ka Sontaga, la 12 Diphalane 2025.

 Mopresidente o hlalositše kotsi yeo e le yeo e nyamišago kudu. Go ya ka dipego, pese e ile ya menoga ge e be e sepela tseleng ye e phagamego kua Louis Tritchard bošegong bja Sontaga.

 Bontši bja banamedi e be e le badudi ba Zimbabwe le Malawi, ba sepela go ya Harare go tšwa Gqeberha ka Kapa Bohlabela.

Ka polelo, Ramaphosa o itše:“Tiragalo ye ke masetla-pelo go Afrika Borwa le dinaga tša boagišane bja rena tša Zimbabwe le Malawi. Manyami a a gakatšwa ke taba ya gore tiragalo ye e diregile nakong ya Kgwedi ya rena ya ngwaga le ngwaga ya Dinamelwa, moo re beago šedi ye e kgethegilego go bohlokwa bja polokego ditseleng tša rena.”

 Mopresidente o okeditše ka gore ditsela gape ke dinetweke tša ekonomi tšeo di kopanyago batho ba selete sa rena go putla mellwane ya bosetšhaba.  “Re swanetše go dira sohle seo re ka se kgonago bjalo ka badiriši ba ditsela, bjalo ka bao ba šomago ka dinamelwa, baotledi le banamedi go netefatša gore re dula re bolokegile le gore re abelana ditsela tša rena ka maikarabelo le ka tlhokomelo go yo mongwe le yo mongwe.”

 Balaodi go tšwa go kgoro ya dinamelwa ba be ba dutše ba fana ka dimpshafatšo ka ga palo ya mahu ge ditopo tše ntši di hwetšwa ka gare ga dithotobolo ka Mošupologo.

 Ditirelo tša tšhoganetšo di bontšhitše gore baphologi ba ka bago 49 ba išitšwe dipetlele.

Tona ya Dinamelwa Barbara Creecy o boletše gore pese e be e imetšwe kudu ka nako ya kotsi.  “Pese e be e na le laesense ya go rwala batho ba 60 eupša batho ba 91 ba be ba le ka gare,”a realo.