Baobaotledi ba 20 ba swerwe ka morago ga go hwetšwa ba otlela ba nwele madila

Baotledi ba 20 ba swerwe profenseng ya Limpopo ka lebaka la go otlela ba le ka fase ga khuetšo ya madila nakong ya lesolo la Phuza Weekend la polokego ya ditsela ya matšatši a mararo.

Lesolo le le dirilwe go tloga ka Labohlano, 8 Phato go fihla ka Sontaga, 10 Phato moo maphodisa a be go a le mafelong a bohlokwa a ditsela.

Go ya ka kgoro ya Dinamelwa le Tšhireletšo ya Setšhaba, tekanyo ya madila ye e hweditšwego e le godimo kudu e be e le 0.7 mg/100ml go la Lephalale.

Mootledi o mo nnyane wa go swarwa e be e le monna wa mengwaga ye 30 go la Phalaborwa, mola yo mogolo e le monna wa mengwaga ye 43 go la Malamulele.

Molekgotlaphethiši wa kgoro Violet Mathye, o galefile ka baotledi bao ba otlelago ba tagilwe, mme a bolela gore ke “boitshwaro bjo bo se nago maikarabelo” bjo bo beago maphelo a baotledi le a badiriši ba bangwe ba ditsela kotsing.

“Re kgopela gore badiriši ka moka ba ditsela ba etiše polokego pele gomme ba tšeye diphetho tšeo di nago le maikarabelo,” a realo.

Le ge go na le mananeo a polokego ditseleng a go lemoša setšhaba, kgoro e bontšhitše matshwenyego ka baotledi bao ba sa obamelego melao ya tsela.

Molekgotlaphethiši Mathye o tiišitše gore ba tla tšwela pele go gatelela molao gomme ba kgopela setšhaba go thuša go hlama setlwaedi sa go otlela ka maikarabelo.

Lesolo la Phuza Weekend ke karolo ya letseno la polokego ya ditsela la profense, le le ikemišeditšego go fokotša dikotsi le mahu a ditsela ka lebaka la madila.