Dula lebaleng la gago Extension 133, goba o lahlegelwe ke lona

Bao ba nago le mabala efela ba sa duli go wona ba ka a lahlegelwa.

Se se tla ka morago ga gore masepala wa Polokwane o ipiletše go badudi bao ba filwego mabala a bodulo go la Extension 133, Seshego ka ntle ga Polokwane gore ba dule go wona.

Masepala o laeditše gore mabala ao a se nago badudi a ka fiwa badudi ba bangwe, go ya ka mekgwa ya kabo ya tshepedišo ya masepala.

Mmoleledi wa masepala, Thipa Selala o re ba hlohleletša beng mabala go dula go wona ntle le go senya nako.

“Masepala o kgala bao ba dutšego ntle le tumelelo ka gore go dula lefelong ntle le tumelelo ke tshelo ya molao. Ba ba dirago bjalo ba ka ntšhwa ntle le tsebišo, gomme masepala o ka se rwešwe maikarabelo a tshenyo go ba tahlego ya thoto nakong ya go tlošwa,” a realo.

Go thuša tshepedišo, masepala o tla ntšha tsebišo semmušo mabapi le nako ya kabo ya mabala. Badudi ba kgopelwa go leta tsebišo yeo le go latela ditaelo ka botlalo.