Tonakgolo ya Limpopo, Ngk Phophi Ramathuba o nyamišitšwe ke seemo sa khamphane ya Great North Transport

Tonakgolo ya Limpopo, Ngk Phophi Ramathuba, o kgopetše Great North Transport (GNT) go tšea kgato ka pela go phethagatša leano la yona la go fetola maemo, e le go thuša setšhaba sa profense ka ditirelo tšeo di kaonafetšego.

Tonakgolo o gateletše bohlokwa bjo GNT e nago le bjona bjalo ka khamphane ya dinamelwa ya setšhaba yeo batho ba bantši ba e tšhephilego go fihla mafelong a bona letšatši le letšatši.

Ramathuba o boletše gore go bohlokwa go bušetša GNT maemong ao e bego e nago le wona mo nakong e fetilego.

“Re ka se dumelele GNT go ya fase. Bjalo ka mmušo re tla fa khamphane thekgo go e bušetša lefelong le lebotse,” a realo.

O dumetše gore mathata a ka tšwelela nakong ya phethagatšo ya leano, eupša a lemoša gore go diega ga go a swanela go fetoga selo se se tlwaelegilego.

“Re a kwešiša gore mathata a ka hlaga, eupša re ka se dumelele gore mabaka a go diega di tšwelepele,” a oketša.

Tonakgolo o gateletše gore GNT ke molala wa bophelo go batho ba bantši mo profenseng, gomme e swanetše go dula e fa setšhaba ditirelo tša boleng.

Nakong ya etelo ya Seshego Depot Ka Mošupologo, 21 Mosegamanye, Tonakgolo bontšhitše go nyama ka lebaka la maemo ao a sa kgahlišego a mafelo ao. O ikanne go šomišana le mmušo go bona gore go tsenwa gare ka pela.

“GNT e thuša kudu go fokotša ditshenyegelo tša bophelo mo porofenseng ya rena,” a hlalosa. “Re tlile go lwela go boloka GNT gore e se tswalelwe.”

Molaodi wa nakwana wa GNT, Ngk Ntsewa Mokobane o boletše gore khamphane e na le leano la go oketša palo ya dipese go tloga go 99 go fihla go 264 mo dikgweding tše tshela tše di tlago.