Tonakgolo Ngk Phophi Ramathuba o lekola dikgoro le malekgotlaphethiši a gagwe go bona ka moo ba šomago go aba ditirelo
Tonakgolo ya Limpopo, Ngk Phophi Ramathuba o thomile ditekolo go lekola malekgotlaphethiši a gagwe go bona ka moo ba šomago go phethagatša dithulaganyo tša mošomo tša ngwaga.
Ka Laboraro, 10 Lewedi malekgotlaphethiši a 4 a bile a mathomo go ema pele ga tonakgolo. Ke molekgotlaphethiši wa Kgoro ya Thuto Mavhungu Lerule-Ramakhanya, Kgoro ya Temo le Tlhabollo ya Magae, Nakedi Kekana, Kgoro ya Tlhabollo ya Ekonomi, Tikologo le Boeti Tshiṱereke Matibe gammogo le molekgotlaphethiši wa Kgoro ya Dinamelwa le Tšhireletšo ya Setšhaba, Violet Mathye.
Tshepetšo ye e latela morago ga go saenišwa ga ditumelano tša kabo ya ditirelo magareng ga tonakgolo le malekgotlaphethiši. Ditumelano tšeo di ba laela gore ba romele ditlaleletšo tša ngwaga ka moka tša go bontšha ka moo ditumelano di phethagaditšwego.
Ditlemo tše di beilwe morago ga go tšweletšwa ga dipoelo tša go hlahloba dipuku tša ditšhelete ka kgwedi ya Phato. Ramathuba o re ditshepedišo tše di rerilwe go matlafatša boikarabelo le go kaonafatša ditirelo tša mmušo go dikgoro ka moka.
“Tshepetšo ye e dira gore yo mongwe le yo mongwe wa rena a dule a ikarabela go setšhaba,” a realo. “Re hweditše dikgoba tšeo di tla re thušago go šetša kudu ge re tsena dikgweding tše di latelago. Re dumela gore tsela ye re e tšerego e bohlokwa go netefatša gore kgoro yenngwe le yenngwe e fihlelela maikemišetšo a yona.”
Tonakgolo o boletše gore dikgoro ka moka di bontšhitše dihlahlobo tša dipuku tše di kgahlišago, efela a gatelela gore ditshekatsheko tše di rulagantšwe go kaonafatša mošomo.
Tekolo ya bobedi e diregile ka Labohlano, 12 Lewedi mme ya akaretša molekgotlaphethiši wa Kgoro ya Pušo Tirišano, Bodulo bja Batho le Merero ya Setšo, Hlabollo ya Leago, Matlotlo a Profense, Dipapadi, Bokgabo le Setšo, Maphelo gammogo le Mešomo ya Setšhaba, Ditsela le Meago.
