Badudi ba phela ka poifo ka morago ga gore monna le mosadi ba hwetšwe ba thuntšhitšwe kgauswi le lefelo la borobalo

Ka Mogale Mohale

Monna (38) le mosadi (39) ba hweditšwe ba hlokofetše kgauswi le lefelo la borabalo.

 

Ba hweditšwe ka Labobedi bošego, 17 Phupu go la zone 6, Seshego ka ntle ga Polokwane, Limpopo.

 

Se se tla ka morago ga gore badudi ba kwe medumo ya sethunya mme ba tšwa go nyakišiša. Ba hweditše batšwasehlabelo bao ka gare ga letamo la madi mme ba bitša maphodisa.

 

Ge maphodisa a fihla, a hweditše batšwasehlabelo ba na le dintho tša sethunya.

 

Mmoleledi wa maphodisa Colonel Malesela Ledwaba o re mosadi yoo o hweditšwe le dintho tše mmalwa tša sethunya dithong tša gagwe tša go thoma nokeng go ya godimo.

 

“Monna o thuntšhitšwe fela ga tee lehlakoreng la hlogo. Ba išitšwe bookelong go hwetša thušo efela ka manyami, ba hlakofala ka lebaka la dikgobalo tšeo ba di hweditšego,” a realo.

 

O re ba nyakišiša melato ye ka morago ga gore ditopo tše pedi di hwetšwe le dintho tša sethunya.

 

“Sa go hlohleletša dipolao tše ga se tsebegi ka se sebaka, efela ga re kgaphele thoko hlokofatšo ya bong,” a realo.

 

Ledwaba o re yo a nago le tshedimošo mabapi le tiragalo ye a ka letšetša Warrant Officer Calvin Magoro go 084 411 8008.

 

Badudi ba re tiragalo ye e ba tšhošitše. “Re dula ka poifo ka gore ga re sa bolokegile. Ditiragalo tšeo di diregago mo Seshego di ya tšhoša mme re ipeletša go maphodisa gore a šome ka thata go golega bao ba dirago bosenyi,” gwa realo moodudi (34).