Batho ba go lekana 200 ba boetše ba bona gape ka morago ga go dira karo ya mahlo bookelong bja Mankweng

Batho ba go lekana 200 go ralala le profense ya Limpopo ba boetše ba bona gape ka morago ga go dira karo ya mahlo ka katlego bookelong bja Mankweng, bjalo ka karolo ya kgwedi ya Nelson Mandela ya hlokomelo ya mahlo.

Lenaneo le le thomile ke Molekgotlaphethiši wa kgoro ya Maphelo, Dieketseng Mashego ka Mokibelo, 19 Mosegamanye go hlompha letšatši la boditšhabatšhaba la Nelson Mandela, ka nepo ya go fokotša bothata bja mahlo le go kaonafatša boleng bja maphelo a bao ba sa bonego gabotse.

Mo dibekeng tše di sego kae, balwetše ba 197 ba dirilwe dikaro tša mahlo bookelong bja Mankweng. “Modiro wo o fetola maphelo. Go boela go bona gape go ra gore motho o tla boela bophelong bja gagwe ka seriti le tshepo. Ke ikgantšha ka sehlopha sa bookelo bja Mankweng ka boneelo le boikgafo bja bona go hlankela batho ba rena,” gwa realo Molekgotlaphethiši Mashego.

Kgoro e tla tswela pele ka lenaneo le bookelong bja Elim, moo go tla dirwago tshekatsheko ya mahlo le dikaro tšedingwe tša go fodiša ka fase ga lenaneo la Rural Health Matters.

Leano le le lebišitse go thušeng ditšhaba tša magaeng ka go ba tlišetša ditirelo tša kalafo tša maemo a godimo kgauswi le bona.

Mashego o hlohleletša badudi ba Limpopo go šomiša ditirelo tša hlokomelo ya mahlo tšeo di lego gona le go nyaka thušo ka pela ge ba lemoga mathata a pono.